Vehbur khawn leh Mizoram

Mizoram Police chuan tunlaiin social media-ah ṭanpui ngaite ṭanpuina tur vehbur khawn an tam thu leh, heng zingah hian rintlak loh an awm ṭhin avangin fimkhur takin an hriat chian leh rintlakte hnenah chauh ṭanpuina pe ṭhin turin mipui an ngen a, pawl ṭhenkhat phei chuan pawisa petute pek tam dan azira pawisa dawn let dan an siam thu an tarlang a ni.

Tun hnaia Mi­zorama thil lar tak pakhat chu mi zawng zawng hriata ṭanpuina pek chungchang hi a ni a, hei hi tunlai media leh social media ṭhang zelin a ken tel a nih rualin tun hmaa Mizo zia nen kha chuan a inpersan hle. Pi leh pute kha chuan midangte an ṭanpuiin a ruk thei angin an pe ṭhin a, tunah chuan ṭanpuina pek apiang hi kan puangzar ta deuh zel a ni ber mai.

Hei bakah hian ṭanpuina petu tak tak ni phak chiah lo, midangte'n ṭanpuina an pek theihna tura thawktute an awm leh bawk a, heng mite hi an ṭangkai em em rualin intihhmuh theih a nihzia chu a takin a lang mek. TV/chanchinbu leh social media lama remchang neite'n midangte ṭanpuina tur an han siam a, mi hrang hrangin an pe khawm ruih ruih a, a tam ber hi chu an pek chhan ang takin a thlenna tur dikah a thleng a; nimahsela mi rinawm lo ṭhenkhat pawh an lo inrawlh ve ṭhin tih a lang chho mek a ni.

Engpawhnise police lamin thu­chhuah an siam ngai hial khawpin vehbur khawn danah thil dik tawk lo a awm tih a lo lang chhuak ta hi a pawi hle mai a, hei hian rinawm leh taima taka midangte ṭanpuina dawh­thleng dawh ṭhinte thleng­in a tibuai palh thei a ni. Engpawhnise mipuiin a dik leh dik lo thliar thiam ila, ṭanpuina kan pe duh a nih pawhin hriat chian lohte kal tlanga pek loh hi a him ber awm e.