Sorkar sum

Chief Minister chuan, Covid-19 avangin khawvel, India leh Mizoramin harsatna an tawk tih sawiin, "Kan duh emaw, duh lo emaw, min tuam si. Sorkar lian leh ropuite pawhin tihngaihna an hre bik lo. Covid-19 avangin sum leh pai dinhmun a chhia a, tihngaihna a váng a, hrehawm kan ti tlang. Sorkar hnaah hmun ruak hnawhkhah loh a tam a, kan sum dinhmun a chhiat êm avangin a pawimawh zual pawh kan hnawh khat thei lo. In (police) indaih lohzia kan hria a, a hrehawm khawp mai," tiin Police hnuaia hna ruakte hnawh khah loh chhan a sawifiah.

Mizoram sorkarin sum a nei lo tih leh sumah harsatna a tawk nasa hle tih hi kan zavaiin kan hre chiang tawh a, thawh chhuah nei lem lo state kan nih avang leh chhiah aṭanga a lakluh tih lohah sum lakluhna tur kan sorkarin a la hriat vak loh avangin kan harsa dâwn tih hi thil chiang sâ a ni. Hripui leng hi chhuanlam remchang tak a nih rualin sum harsat chhan bera puh reng hi a fel lo a, a chhan dang a awm tih leh sum hi sorkarin a duhna kawngah hman tur a nei tih pawh mipuiten an hria a ni.

Mizoram sorkar hnuaiah tho hian 'construction' lamah chuan sum hman tur a tlem lo tih mipuiin a takin an hmù reng a, hengte hi a thawktu lamah hian a hming tumtu chu tu pawh ni se a phena hlawkpuitu a rin hriat theih avangin hripui len lai pawha construction a chawl lo hi thil mak pawh a ni lo. Sorkarin ral leh lama sum harsatzia a sawi laiin a ral lehlamah chuan kan mamawh nge mamawh lo tih pawh sawi loin construction hna lian tham a kalpui mup mup reng tih kan hmù mêk a ni.

'Sorkar laipui aṭanga sum lo kal hmun danga hman pen theih loh' tihte hi kan hotute hian an sawi rik tam tehlul nen sorkar laipui aṭanga lo kal tho scheme leh project hrang hranga central lam sum pek chhuah tawhte chuan a dawngtu tur kut a la thleng lo a, kan state sorkar hian a duh chin a pe chhuak a, a duh loh chu a hup bet a ang hle.

Engpawhnise kan ram sum dinhmun chhiatzia sawitu thoten an duhsak zawngte hnathawh tur lamah sum harsatna an sawi lo hi a mak a, Minister zingah ngei pawh hna kalpui thei bîk tak an awm rengte hian sum leh pai enkawl kawngah sorkar hi a ṭan thar a ngai tih a tilang a; 'Mizoram sorkar hian sum a nei lo tak tak nge, an ngaih pawimawhah chiah sum hman an phal zawk?' tih hi zawhna awm thei a ni.