Hriselna ruhrel ngaih pawimawh
Health Minister chuan Mizoramah Health Worker leh Nurse ṭhahnem tak lâk belh a nih tur thu sawiin, 'Strengthening of health system in Mizoram project' hnuaiah World Bank kaltlangin cheng vbc. 280 séngin Mizorama hriselna lama ruhrel tihchangtlunna tur nikum aṭangin bul ṭan a nih thu a sawi.
Health Minister chuan, "Thingtlanga health infrastructure leh primary healthcare tihhmasawn ka ngai pawimawh hmasa a, Mizorama sub-centre zawng zawng health & wellness centre-ah upgrade vek tum a ni," tiin health & wellness offi cer (B.Sc Nursing)-te'n an enkawl tawh dawn thu a sawi bawk.
He thil hi Mizoram tán chanchin lawmawm tak a ni a, a bikin thingtlang mipui tán a lawmawm dâwn hle a ni. Khawpui leh thingtlang hian kawng hrang hrangah inthlauhna a nei a, chumi zingah chuan hriselna lama inenkawlna in ṭhat hleih hi thingtlang leh khawpui inkar a zauhna ber pawl a tling ang.
Hei hi hmù fuha sorkarin hriselna lama hmasawnna tur lian thama kalpui a tum hi thil lawmawm tak a ni a; Mizoram sorkarin sum a neih loh avanga bank aṭanga pawisa pûk a nih hre reng hian a hmanna pawh uluk se. A rulh kawngah state phurrit hnutchhiah lo tura ruahmanna siam thiam pawh a pawimawh hle ang.