Sorkar thawhpuitu nia inchhal Champhai NGO-te au hla

Champhai District NGO Coordination Committee bul­tumin tun hnai khan Cham­phaiah 'Dinkna Tundin Kawng­zawh' neih a ni a, hei hi Mizoram sorkarin Champhai DC a transfer sût leh tura karna a ni.

Champhai NGO hruaitute chuan sorkar an do loh thu leh sorkar lamah an ṭan thu sawiin, "India leh Mizoram sorkar thuchhuah bawhzuia Kelkang daia Champhai DC-in Myanmar aṭanga dan loa lak luh kuhva a man chungchangah mi dik lo zawkin FIR a thehlut ngam hi Champhai mipuiin lungawi thlak loh kan ti a ni," an ti a, Champhaiah diknain rorel se an duh thu leh, dikna rahbeha a awm chu an do ber a nih thu an sawi.

Champhaia thil thleng hi mi ṭhenkhatin sorkar dona lam hawiah an ngaih laiin kawngzawh huaihawttute chuan sorkar lamah an ṭang tlat tih an sawi ve thung a, sorkar laipui leh state sorkarin a khap dan loa kuhva lakluhna kawnga Mizoram sorkar mi leh sa (Champhai DC) hmalakna an thlawp tih entirna a nih zawk thu an sawi.

Champhai NGO hruaitute thusawi hi ngun taka ngaihtuah tham a ni a, mipuite dikna duha an au chhuaha sorkar do anga kan ngai tawh a nih chuan thil fel lo lian tak a awm tawh zawk a ni thei. Champhai NGO-te chuan sorkar dodal zawngin ke an pen lo tiin sorkar thupek kengkawhtu laka dan bawhchhetu lamin huangtau taka FIR an thehlut ngam ta mai duh­lohna an lantir zawk thu an sawi a, chu bakah chuan mi pamhamte'n ram leh hnam an thunun an phal loh tur thu an puang bawk a ni.

Champhaia thil thleng hi kuhva phurh ruk man leh DC transfer thil ringawt a ni lo a, hei aia thukah hian thil a awm tih a lang reng tawh. Mizoram kaltlanga dan dik loa sumdawnna hi sorkarin a pawmpui a nih ngawt loh chuan a tih tawp ngam tur a ni a, dinna pawh nei chiang ngam loa sorkar a awm ta reng leh Champhai lam MLA-te an ngawi tlat maite hian ngaih a tiṭha lo a. Magistrate leh Police inkara khi a awm nia lang te hi a pawi lehzual a ni. He buaina hian ram tan rah ṭha chhuah ngei se a duhawm hle.