State pawn lam mite

Tun hnaiah Mizoram mi state pawna tangkhangte sorkar ruahman angin an lo haw mek a a; hetihlai hian Aizawl khawpuia veng tam tak chuan an vengah state pawn mi hnam dang an awm belh lohna turin lockdown laiin  temporary ID card siamsakin an chhinchhiah.

Zarkawt Local Task Force-te chuan tun hnai khan an veng  huam chhunga hnam dang awmte sawi lawk awm loin an endik thut (surprise check) a, lockdown ṭan tirha awm lo hnam dang eng emaw zat an hmu chhuak a; nimahsela heng mite hi ngun taka an endika an zawh chhuah hnuah state pawn aṭanga lo lut ru ni loa hriat an ni. 

Covid-19 lakah Mizoram hi hmun him niin a lang mek a, tunah hi chuan Mizoram chhungah he hri hlauhawm kai hi an awm lo niin a ngaih theih. Nimahsela loh theih lohna avangin kan chhung te, kan ṭhian­te leh kan unaute state pawna tangkhang mek an lo haw a ngai a, anni zingah hian van­duaithlak taka Covid-19 hri rawn lalut an awm palhte a nih ngawt loh chuan kan him chhunzawm zel tur angin a ngaih theih. 

Hetihlai hian thil hlauhawm tak awm thei erawh chu state pawn lam mi lo lutte kan ven hneh loh chuan he hri hlauhawm hi an rawn luhpui thei a, uluk zawka inven a ṭul. Ramria chengte chuan hun rei tak chhung chhun zan zawmin, thlipui leh ruahpui karah hmun hrehawm takah ram ven hna an thawk a, an theihna sang ber an hlan mek. 

Khawpui leh hmun hima awmte hian tih ve theih an neih chu an khua leh veng ṭheuh an venhim ṭhat a ni.  Khawpuia veng tam tak chuan an veng chhunga hnam dang (Vai) awmte an tlawh chhuak vek a, an chhinchiah fel a, temporary ID card-te an siamsak. Lockdown laiin hnam dang lo lut ru awm ta ang se, an veng chhungah awlsam takin an zawng chhuak thei mai dawn a, hemi kawngah hian ID card siamsak ṭheuh hi a pawimawh khawp mai. 

Covid-19 hri len lai kher lo pawh hian dan loa lut rute venna tur leh, kan state hi hnam dang laka a him zawk theihna turin mahni huam chhunga chengte chhinchhiahna fel tak neih vek hi chu thil ṭha tak a ni. Tun Covid-19 boruaka state pawn lam mi hnam dangte kan chhinchhiah hi chhunzawm theih ni se, ram leh hnam humhalhna kawngah thil ṭangkai tak a ni thei awm e.