Smuggling chungchanga CYMA dinna Mizoram mipuiin an thlir reng dawn
Central YMA chuan dan loa Myanmar aṭanga kuhva rah tawlh ruk tihtawp a nih theihna turin February, 2022 ral hma ngaia checkgate rintlak siam turin Mizoram sorkar a ngen a, hun tiam chhunga checkgate siam a nih loh chuan YMA-in a thiam danin hma a la dawn. CYMA chuan YMA hruaitute leh member-te chu dan loa sumdawnnaah inhnamhnawih lo turin an ngen nawn leh a, dan loa sumdawnna chuan nghawng ṭha lo tam tak a neih avangin an do zel dawn a ni.
Ram pawn aṭanga dan loa thil lakluh (smuggling) chungchang ram pumin kan khel ta luih luih mai hian kan ram dinhmun dik tak chiang takin a tarlang. Tuna kan hmeh mih loh chuan 'smuggler' kan tihte hian kan ramah hnehna an chang tihna a ni thei ang. He thila inhnamhnawihte hian sawi mawi tum ṭhin mah se Assam Rifles tlan chhiatsan a, kawng rukte siama a man theitute man hlaua an bihruk zuk zuk dan aṭang hian a dik lo tih a chiang reng tawh. Mizoram police-te'n an mit an lo siai deuh a nih pawhin danin dik lo a tih chu thil dik lo a ni reng dawn a ni.
Mi tam takin ruihhlo tawlhrukte nen a inan loh dan leh khawtlangin an ṭhatpui dante sawi mah se, dan loa sumdawnna hlawk tak hian thil dangah nasa takin nghawng ṭha lo a nei a, hei hi CYMA lam pawhin an rawn vei chat a ni. Ruihhlo a ni emaw, ralthuam a ni emaw, rangkachak a ni emaw, kuhva pawh ni se dan loa ram pawn aṭanga lakluha sum siamna thil a nih chuan a fel lo tih hi 'pawm phal' ila. Dan ang taka lakluh dan sorkarin a ngaihtuah hma chu he sumdawnna lakah hian YMA member-te inthiarfihlim ngam ila a lawmawm ngawt ang.
Tuna kan chhut chah loh chuan a sum nei zawk an nih angin lam ṭang siam an awlsam dawn a, kan dinhmun kal mek en phei chuan thuneitu lam hi lam ṭangah an siam vek tawh zawk anga ngaih hial pawh a awl ta rum rum mai.
Mizoram mipui tam zawkin an duh loh sumdawnna thianghlim lo hi kuhva phurh ruka inrawlh mi tlem te leh an thurualpui ṭhenkhatte avang mai hian ding chang zawkah ṭang lo se, CYMA-in huaisen taka a do hi a takin bawhzui bawk se. Mizormah hian sum siamna a nih tawh phawta a hlawkna teltu lamin kan sawi mawi vek hi i sim ang u khai.
CMYA-in dan loa kuhva sumdawnna titawp turin a taka hmalak a tum a, Zoram mipuiin an lo thlir reng dawn a ni.