Champhai DC dan leh sorkar

Champhai DC chu sorkarin a tranfer avangin January 26, 2022 khan Champhaia a awm hun a tawp tawh a, hetihlai hian Champhai NGO Coordination Committee-te chuan a chhuah phal loin DC bangla kawtah an dang a ni.

Champhai mipuite hian an DC hi a mimal takin an ui tih loh rual a ni lo a, chutihlaiin an ui chhan lam hi chhut chianin sorkar pawh thiam takin a inrawlh theih ngei hmel a, hetianga sorkar official chhuak tur tawngpawng dan beh emaw, inbiakna leh inremna lam hawi thil tih awm loa kal ringawt hi chu thil fel ber a ni lo ang.

Champhai mipui­te thil duh hi a chiang tawh a, dan loa kuhva tawlhruknaa inhnamhnawih zawkin DC laka FIR an thehlut ngam ta hial khawpa Champhai leh a chhehvela dan loa sumdawnna a hluar hi ṭha an ti lo. Hetianga mi dik lo zawkte an inlulin tawh chuan kawng hrang hranga a chhe zawnga nghawng a neih theih avang leh, sumdawngte rorelna hnuaiah an la tlu lut mai dawna lang chu an duh lo a, chumi do ngam DC chu chhuak lo turin an duh ni berin a lang.

Heti a nih chuan sorkar lam pawhin pâ chan chang ngamin thil ti se, ngawi renga ralthlir mai loin inremna kawng dap se a ṭha khawp mai. Champhai mipui duh anga dan loa sumdawn-na titawp tur leh, dan bawhchhiaa sumdawnna kalpuitute inluling lo turin sorkarin a nihna takin dan kengkawh ngam tawh se. Chutiang ti turin sorkar laipui thuchhuah awm tawh sa bawhzuia kenkawh intiam chungin sorkar hian remna kawng zawng hram se a ṭha hle.

DC chhuak tur mipuiin an dan beh tawh pawha sorkar a la ngawi reng mai leh, sorkarin ro a rel ngam lo anga lang hi a fel lo a, Champhai mipuite hmangaihtu sorkar a nih chuan a au chhuah ngam a hun hle a ni.