Pawisa neih loh laia pawisa sem
MNF President leh Finance Minister ni bawk chuan SEDP kalpui ṭan an tum thu sawiin, MNF unit-te chu SEDP dawngtu tur lo thlang turin a chah a; SEDP-ah Rs 40,000 - 50,000 vel chhungkaw 50,000 - 60,000 vel hnena sem phawt an tum thu a sawi.
Mizoram politics-a inhnialna lian tak awm chu a thlawna sum sem duh leh duh loh hi a ni a, hei hi chu political party lamin an duh an thlang chiang tawh a, an kal duh dan pawh a chiang tawh a, inhnial zuina tur awm vakin a lang lo. Ngaihtuah chian ngai erawh chu sorkar sum tia kan sawi hi mipui sum a ni a, chu chu ruling party sum ni loin Mizoram mipuite sum a ni.
Sorkarna chelh mektu chuan a duh angin sum hi a hmang thei a, sawisel vak theih pawh niin a lang lo; nimahsela a sem dan phungah hian sorkar lam aia political party unit level-te'n sorkar pawisa an sem emaw, a sem danah thu an nei tur anga sawi hi chu sorkar sum hman dan tur dik niin a lang lo.
MNF hian kum 2018 inthlan hma khan Mizoram mipui hnenah Rs 3,00,000 sem an tiam a, chhungkaw tin hnena sem an tiam mai ni loin NLUP dawng tawh pawhin an dawn vek tur chu an President leh tuna Chief Minister ni mek hian a sawi. Tuna an sem tum danah hi chuan a pawisa zat leh a chhungkaw zat pawh a tlem ta duai a, an thutiama an din leh din loh chu hunin a la hril ang.
Sorkarin sum sem a tiam a, a sem zat tur (amount) lamin a sawi chiang sa vek a, tuna sem an tum nen hi chuan a inthlau hle a; engpawhnise dinchhuahpui thama in pui si lo a, nakina vote hmuh lêtna tur a nih beisei vang emaw, vote-tute tihlawmna tur ang deuha sum sem hi kan ramin a ṭhatpui nge ṭhatpui lo tih chu NLUP-a Rs 1,00,000 sem a nih tawh hnu hian a chiang awm e.
Mizoram sorkar, a hnathawkte hlawh pawh thla chanve hnu lama pe thei chauhin pawisa sem a tum hi thil danglam tak a ni a, Police department-a post hnawh khah theih loh chhanah sorkar sum dinhmun chhiatzia sawi hnu lawka sum sem lam sawi mawi pawh hi a inhmeh zan lo a; nimahsela MNF-in an lo intiam tawh a nih angin pawisa chu an sem dawn a nih hmel a, mipuiin a tira an phût pawh ni loa an sawi hmuh zat Rs 3,00,000 hi mipui lamin an beisei chu a ni lo thei lo.