Electric bill, mipui leh sorkar
Mizoram sorkar chuan electric bill man tur bithliahtu, Joint Electricity Regulatory Commission for Mizoram and Manipur (JERC) hnenah kum 2022-23 atan kawlphetha hman man (power tariff) ennawn a, 21.05% a tihsan a rawt.
Mizoram sorkar rawtna ang hian tun hnaiah electric bill hi tihsan a lo ni tawh a, mipui lam aṭangin bill a san a tâk avanga lungawi lohna âng thawm a tam hle. Chumi hnu lawkah kan sorkar chuan electric bill bithliahtute hnenah electric chhit man tihsan a rawt nawn leh a, hei hi a hma aia 21.05% zeta säng tur a ni.
Sorkar rawtna anga kal tlangpui a nih chuan mipuiin electric bill hi sang tiin nasa takin an sawisel ngei ang tih a chiang a, chutih hunah chuan a sawt tawh si lo ang. Tunah hian rawtna leh sawi duh neite tán JERC-ah hian ziaka thlen theih a ni a, February 20 thleng hun hawn a ni. Hei hi kan rama pawl hrang hrang te, political party-te leh mimal pawhin ngaihven tlâng ila, se bo hnua se kawng khar an sawi anga a man an bithliah fel tawh hnua phun leh ringawt chu a sawt tawh ṭhin lo.
Mizoram sorkarin heti tak maia electric bill tihsan a rawt leh chhan bulpui ber chu sum a neih loh vang a ni ber. Tun hma pawhin electric hman man mipuiin an chawi hian a man dik tak hi a daih ngai lo a, tun hnua a man an tihpun zel chhan chu sum lama talbuai mêk sorkar hi a ṭang zo tawh ngang lo a ang ber.
Engpawhnise mipui phurrit zawnga kalpui zel mai hi a fuh lo a, thil danga a sema sem tur sum neia insawi sia mipui hnen aṭanga electric chhit man sâng zawk khawn tum hi thil inhmeh lo tak a ni.