Sumah mipui an fir dawn
Congress party, ZPM Ṭhalai leh BJP lamin Mizoramin Covid-19 dona atana North Eastern Council (NEC) aṭanga cheng nuai 300 a hmuh chungchanga zawhna an neihte chu Health & Family Welfare (HFW) department chuan an sawifiah a; sum hmanna tur mumal taka duan a nih thu te, ṭangkai taka hman a nih theih nan chak taka hmalak a nih thu leh, hun bituk chhungin a hmanna tur dik takah hman a nih dawn thu an tarlang.
Tun hmain Mizoramah hian sum hman danah thil fel lo tam tak a awm thu sawiin mipui an phun sup sup a, 'an inphun lungawi e' an tih ang maiin phunah a ral mai ṭhin. Tunah chuan thil awm dan a danglam ta a, ṭhangthar mithiam leh thil chik peih an pung a, social media a lo chak chho bawk nen, sorkar sum hman danah mipui an fir tawh takzet a ni.
Covid-19 dona atana mipuiin sum an thawh khawmna ber Chief Minister's Relief Fund pawh hi uluk leh fel taka vawn a nih loh chuan sorkarna vawnfung chelh mektute tán thil hlauhawm a ni thei. 'Hri lêng dona sum hi a hmanna tur dik takah hman ni se,' tih a ni mai lo a, ruling lam hruaituten politics-a hamṭhatna an neih lêt theihnaa hman a nih chuan mipuiin an ching chhuak leh thuai ang.
Engpawhnise NEC aṭanga pawisa lo kal dan an hre chiang duh a, pawisa kal vêl danah an ngaih a ṭha zan lo a, political party lam an rawn lang ve nghal zat bawk a, chumi hnuah sorkar pawh insawifiah hleithei loin an awm ta a ni ber - sorkar insawifiahna hi mipuiin an pawm nge pawm lo tih chu vote thlak leh hunah emaw an lantir chauh mai thei a ni.