Finance minister thusawi

Mizoram Chief Minister leh Finance department ni bawk chuan, Mizoram sum dinhmun a hriat loh thu leh tunah chuan sawi a harsat thu a sawi a, Covid-19 avangin sum hmuh tur tam tak kan dawn theih dawn loh avangin kan hmalama Mizoram sum dinhmun tur chu Pathian chauhin a hriat thu a sawi. 

Kan ram sum leh pai enkawltu ber, kan Finance minister berin kan pawisa awm dan a hriat loh thu a sawi hian, a sawi uar tum luatah a bawplawka lak theihin thil a sawi tel nual niin a ngaih theih. Tuna Mizo mipui hriat duh leh an zawhna awm reng chu 'Mizoram sum dinhmun' a ni a, 'Mizoram sum dinhmun tur' hi an zawt lemin a lang lo. Covid-19 hri leng kara Mizoram sum dinhmun, hri dona atan an hman dan kimchang leh kan sorkar sum dinhmun hi a ṭha nge ṭha lo, tih hi mipui hriat duh chu niin a lang. 

Politician-te hian thusawi an thiam a, chu ai maha an thiam zawk nia lang chu thil chhan pial leh ben per a ni. Tuna kan political party liana an hruaitute hi hetiang kawngah hian an duai lo hle mai a, an duhzawng sawi chhuah dan, an duh loh sawi chhiat dan leh thil sawi mam leh sawi pial hi chu an thiam zawng tak a ni; nimahsela tunlai khawvelah miin thil hi a nihna tak (fact & figure) an hre duh tawh a, ṭawngkam thiama inchhaih kual vak vak hi an lawm lo hle tih chu social media lamah pawh kan hmu thei ang. 

Mizoram sorkar sum leh pai dinhmun hi hman ni lawkah a ṭhat thu, budget pawn lama lo lut tur ringawt pawh a tam thute Finance enkawltu hian a sawi ṭhin. Chu chu tunah hian a chhe ta thut nge ni a, a la ṭha chhunzawm zel tih pawh kan hre thei lo a, a enkawltupa ber pawhin a sawi chian theih mai loh avangin mipui chu kan bangbo hle zel chu a nih hi.