Raltlan dawnsawn dan tur chin

YMA Sub Headquarters, Lunglei chuan tun hnai khan kohhran hrang hrang hruaitute leh political party-te sawmin Myanmar aṭanga raltlan chungchang an sawiho a, ral­tlante hnenah birth certificate, voter identity card leh docu­ment pawi­mawh­te pe chhuak lo turin an ngen a. Kohhran member ngheta la ziak lut lo tura an ngen bak­ah political party-te pawh party hamṭhatna remchang lo zawng lo turin an chah.

Myanmar tual­chhung buaina avanga raltlan lo lutte hi kan unaute an ni hlawm a, har­satna an tawh miau avangin ṭha taka lo tuam hlawm leh enkawl hi a bata kan bat a ni. Chutihlaiin ram dang mi an nih miau avangin India khua leh tuia inziah luh ngawt theih a ni lo a, Myanmar lam mi an nih avangin kan unaute mah ni se dan anga lo ziah luh theih an la ni lo ang.

Hetiang hunah hian kohhran thlenga ven a ngai ta hi thil hriat nuam lo tak, chutihlaia thil dik tak ni lawi si a ni a, kohhran member neih tam intlansiakna avang hian ṭum dangah pawh harsatna a lo thleng tawh ṭhin a ni.

Tuna Myanmar aṭanga raltlan lo lutte hi kohhranin ṭha takin lo dawngsawngin tisa leh thlarauah chhawmdawlna pawh lo pe ngei se a inhmeh viau a; Pathian thu hrilh leh inkhawm­pui ṭhulh si lo hian a sorkar dana ziah luh theih an nih hmaa kohhrana lo ziah luh lam hi chu hmanhmawh loh ni se a ṭhat a rinawm.

Political party lam mawlh hi ven an ngai ṭhin a, state pawna awm tawh Bru-te vote inchuh chu sawi loh pawisa hial pawh sem duh an awm tawh ṭhin avangin fimkhur a ṭha hle reng a ni.

YMA Sub Headquarters, Lunglei-in thil rel nuam tak ni lo, nimahsela thil rel ṭul tak si huaisen leh fing taka an rel ngam hi an fakawm a, raltlan dawnsawn dana an rawtnate hi district danga mite pawhin zawm thei se a ṭha hle ang.