Invenpui hi inbeihna a ni lo

Tun hnaiah Covid-19 dona tur sum kalpui danah te, Mizoram sorkar sum leh pai dinhmun dik tak puang tura sorkar hotute nawr chungchangah leh, dik leh langtlang zawka pawisa kalpui turin eptu (opposition party) lamin sorkar an nawrna leh sawiselna a awm nual a, thuchhuahte siamin press mite hmaah an ngaihdante an puang hlawm. 

Covid-19 hri kan do tlan laia political party thu lo ri ve sek hi mi ṭhenkhat chuan an ngaithei loin ṭul loah an ngai a, ṭhenkhat thung chuan sorkar khalh ngilna tur hmanruaah an ngai thung. Hetihlai hian thu inchuh hrang hrangah mahni tana chakai khawrh nia puh theih turin political party zingah pawh ṭan la pawl an awm niin a lang.

 

Engpawhnise khawvel huapa kan thlir pawhin Covid-19 dona leh he hri laka invenna tur kalpui danah mahni sorkar duh khawp lohna a nasa tlang a, India ramah pawh eptu lam leh sorkar lam an inbeih bap bapna hmuh tur a awm. Mizoramah pawh hun eng emaw chen political party anga duh khawp lohna thu au chhuahpui an awm meuh lohlaiin, tun hnaiah sorkar duh khawp lohna sawi chhuah a tam ta hle.

PPE lei danah thil fel lo awm nia rinhlelh leh PPE chhe lutuk leiin sawi a hlawh a. Sorkar hnathawkte pawisa 'thawh' tir tum danah sawi neuh neuh a awm a, MLA-te'n an hlawh an thawh tur pawh thu inhmu zan lo a awm niin a lang. Eptu lamin suma kan harsat leh harsat loh an hre duh a, kan ram sum dinhmun dik tak hriat chu pawisa thawh zui zel dan tur thlenga nghawng thei niin an hria a, an au chhuak mek a ni. 

Hetianga sorkarin theihtawp a chhuah chunga eptu lamin an ngaimawh lai an lo au chhuahpui hi inbeihna lam aiin democracy-ah chuan invenpuina lam a kawk thei a; duh thuhmun leh do thuhmun kan nei chung hian kan kal danah invenpui ngai kan ni thei a, eptu lam pawhin an tih tur dik tak an ti chho mek zawk niin a ngaih theih awm e.