Sorkar laipui duhsakna leh Mizoram
Union Finance minister-in kum 2022-2023 sorkar kum atan budget a pharhah India hmar chhak a bika enkawlna tura Prime Minister’s Development Initiative for Northeast (PM-DevINE) atan cheng vaibelchhe 1,500 dah a ni a; he mi hnuaiah hian Aizawl tlak lama 'Aizawl by-pass road' siamna turin cheng vaibelchhe 500 dah a nih bakah Mizorama Bamboo Link Road siamna atan cheng vaibelchhe 100 dah a ni bawk.
Sorkar laipui duhsakna dawnga Mizorama kawng pawimawh leh ṭangkai siamna tur sum dah a ni hi thil lawmawm tak a ni a, ṭangkai taka hman ngei pawh a ṭha hle ang. Tun budget-a dah tak Aizawl by-pass road hi thil thar a ni tawh lo a, nikum lam khan a siam dan tur pawh NHIDCL thuneitu Executive Committee lam pawhin an lo pawm tawh a ni a, Aizawl khawpuia chengte tan thil lawmawm tak a ni ngei ang.
Bamboo link road atana sum ṭhahnem tak sorkar laipuiin a dah pawh hi thil lawmawm tak a ni. Kan sorkarin flagship programme atan mau/rua a puang a, chumi hnuaiah chuan tam tham loa a chi kui ṭiahna leh a chi supply thawm hriat a ni a, hei bakah hian hmun tlem te-ah rua an ching tih loh chu hmalakna sawi tham a la awm meuh lo. Tunah mau/raw chinna hmuna a phurh luhna leh phurh chhuahna tur kawngpui laihna tur sum a awm dawn niin a lang ta a, thil lawmawm tak a ni.
Sorkar laipui duhsakna dawnga Mizoramin kawng pawimawh leh ṭangkai tak tak a neih belh tur nia lang a, Aizawl khawpui helna kawngpui hi he khawpui tawt lutuk leh traffic jam tihziaawmna atan pawh thil ṭul tak a ni. Mau/ rua kan buaipui a nih chuan a phurh chhuahna tur kawngpui siam pawh thil ṭul tak a ni nghal dawn a, kan ramin ṭangkai taka a hman ngei theihna turin tluang takin hna thawk chho se a, a lawmawm hle ang.