Nuai thum sem la tum

Chief Minister chuan tun hnai khan press mite zawhna chhangin SEDP hnuaiah cheng nuai thum sem, an la tum reng tih sawiin an trade-a zirin nuai thum aia tam pawh sem a nih tur thu a sawi.

MNF President hi cheng nuai thum sem tur thu kum 2018 inthlan hmaa campaign-naa sawitu kha a ni a, midang pawhin an sawi rik rualin party president thusawi a nih avang leh a video a darh nasat avangin mipui pawhin an la chhinchhiah chiang hle a ni. Amah ngeiin Chief Minister a nih aṭanga kum linaah cheng nuai thum sem an la tum thu a sawi hian an tum tak tak hle tih a lantir thei awm e.

Miin intiamna an neih chuan an tihlawhtling tur a ni a, inremsiama intiamkamna pawh ni lo; mipui hnena a sawitu lamin an va zawrh zawk thil a ni a, cheng nuai thum aia tam chhungkaw tinin an dawn tur thu a sawi tawh avangin a sem theih dan ngaihtuah hi chu tih ngei ngei tur a ni.

Politics-a thil kalphungah pawisa sem duh an awm a, a sema sem duh lo pawl an awm bawk. Tunah hi chuan a sem duh leh sem ngei tura intiam lamin sorkarna vawnfung an chelh lai a nih avangin an intiam anga sem ngei tur a ni, an intiam zat sem hi a bata an bat a ni bawk.

Pawisa harsat chhan tam tak awm thei zingah Covid-19 hi chhuanlama hman awl tak a ni a, nimahsela he mi karah hian Indian economy pawh insiam ṭha mekin sorkar laipui sum leh pai dinhmun pawh zawi zawiin a ziaawm chho ve zel a, kan state hian thawh chhuah kan nei lo a nih pawhin sorkar laipui lamah an intiam tawh anga sum an sem ngei theihna turin an dil chhuak mai tur a nih hmel.

Chief Minister-in, "Hripui a leng a, nuai thum kan tlin tawh lo ang," tih lam sawi loa nuai thum sem ngei an la tum thu leh, a trade-in a zir phei chuan chu aia tam pawh pek an la tum thu a sawi hi a thlamuanthlak a, Mizo mipuite hriata a thusawi hi a tak chantir ngei se a ṭha ang.