Tangkhangte'n sorkar an beisei dan

Home minister chuan, state pawna tangkhang Mizorama rawn haw tur sing khat dáwn an awm thu a sawi a; rawn hawte chu ni 14 chhung khung hran an nih chhungin mi pakhat tan ni tin ei leh in manah sorkarin Rs. 300 a séng dawn a, an mutbu leh mamawh ṭhenkhat - hrûkpuan, ha nawhna, ha hlo leh a dangte pawh a thlawna pek an nih tur thu a sawi. Home minister chuan, "Tangkhang lo hawte enkawlna atan sorkarin sum a sên belh hnem dawn... mi tlawmngai leh thilphalte zarah eng emaw chen harsatna tâwk loin kan la awm thei a ni," a ti. 

Covid-19 hri a len hnua state pawna tangkhangte chu tunlaiin Mizoramah an rawn haw mek a, eng emaw zat rawn thleng tawhin kalkawnga awm mek leh rawn haw tur ṭhahnem tak an la awm. Heng mite hi an chenna ina haw tlang ngawt a thiang lo a, sorkarin quarantine-na tur hmun a buatsaih bikah an awm a ngai a; home quarantine remchang zawkte chu sorkar leh local level task force lam hriatpuinain mahni inah khung hran an ni bawk ang.

Tangkhangte avanga sorkar insensona hi a tam tham hle mai a, a la insengso dawn chauh niin a lang. An kalna senso chungchangah mahni intum mai tura tih an ni chu ṭhenkhatin an hrethiam lo a, an ei leh in lo sawisel tawkte an awm bawk. Engpawhnise heng hi lo tawngpawng dem ngawt tur a ni lo a, sorkar an hmuh dan leh an ngaihdanah sum leh paia harsatna nei lo, tangkhangte mamawh ang tumsak thei tura an hmuh vang pawh a ni thei ang. 

Kan ram sum leh pai enkawltu lamin harsa tak chunga kal hram hram kan nihzia lam an la sawi lo a, mipuiin kan theihna anga sorkar ṭanpui leh puih lêt a hun tawh thu leh sorkar a mangan thute han sawi chhuak se chu, mipui lam hian sorkar hi beisei chin tawk an thiam ngeiin a rinawm. 

Home minister thusawiah hian kan dinhmun niawm tak chu a hmuh theih ta ruak a, "Mi tlawmngai leh thilphalte zarah eng emaw chen harsatna tâwk loin kan la awm thei a ni," a tih hian kan state sum leh pai dinhmun hi a 

ṭha lo tiin ngaihdan a siam theih ang. Hei hi state pawna tangkhang lo haw tawh, lo haw mek leh lo la haw turte pawhin vawng reng se, sorkar hi beisei dan chin tawk thiam a ngai a; Finance minister-in sum leh pai harsatna leh a manganthlak thu sawi lem lo mah se, sorkar hian tangkhangte mamawh leh duh ang zawng zawng pe thei turin sum leh pai a nei lo niin a ngaih theih.