Compensation vanga hna ṭhulh

Vairengte leh Sairang inkar kawngpui NH-06 leh NH-306 zauh hna Ministry of Road Transport & Highways (MoRTH) hnuaia thawh tur chu zangnadawmna tur sum dil a tam lutuk avangin hna ṭan theih a ni lo.

Sorkar project lian deuh kalpui a nih dawn hian an thawhna hmun turah mimal ramte lak a ṭul ṭhin avangin zangnadawmna sum pek chhuah ṭhin a ni a, hei hi state dangah pawh thil kalphung pangngai a ni. Hetihlai hian Mizoramah hian vawi tam tak zang­na­dawmna sum avangin harsatna a lo thleng tawh a, tun hnaiah pawh a huna hna ṭan theih loha a awm hi a pawi hle a ni.

Tuna hna ṭan theih loh chhan piah lamah pawh hian he kawngpui laih turah hian inhnialna tam tak a lo chhuak tawh a. VC pass siam dan te, Periodic Patta pek chhuah danah te leh House Pass leh LSC siam dan te thlengin sawi neuh neuh a tam hle. Tun hnaiah helai hmuna kawngpuiin a paltlang tur ram hralh leh lei pawh a tam hle tih zep rual a ni lo a, kawngpui paltlang tur ram hre thei fâl deuh leh a lei huai deuhte thlengin an awm a, a zialo hle a ni.

Heng thilte hi sorkarin a duh chuan huaisen takin a chingfel thei tih a chian laiin a huai ngam lo ṭhin a, 'zawlbuka e tang ṭheuh ṭheuh' tih ṭawngkam hman ngai tur ang maia zangnadawmna pek tur a awma kan sorkar a huai ngam ngai lo hi a pawi hle.

Dik tak chuan thil hre chiangtute hi a tawpa mi hminga hlawkna teltu an ni leh mai ṭhin a, chu chu he kawngpui laih turah pawh hian a thleng lo ang tih a sawi theih loh. Kawng laih tur ruahmanna awm tirh aṭanga thil kal dan thlir hian a hun taka hna an ṭan thei mai lo pawh hi thil mak tak a ni vak ta lo e.