Kuhva ro aṭanga chhiah lâk

Mizoram sorkarin kuhva rah ro aṭangin chhiah, Goods and Services Tax (GST) 5% a la ṭhin a, chhiah a lakna kuhva rahte chu Mizorama thar emaw, Myanmar aṭanga lâk luh emaw a nih leh nih loh an hriat loh avangin Myanmar aṭanga kuhva rah lâk luhah chhiah lak a nih leh nih loh leh chhiah lak zat (amount) an hre lo. Hetih lai hian, Taxation minister chuan, khawchhak aṭanga Mizoram kaltlanga kuhva rawn lut aṭangin Mizoram sorkarin chhiah a lâk thu leh chhiah (GST) lak zat chu 5% a nih thu, February 2021-a Assembly budget session-ah a sawi thung.

Myanmar lam aṭanga kuhva ro lo luh dan, a lo luhna, a kal zel dan, chhiah lâk dan leh a kal­phungah hian thil thlir thiam harsa tak a awm. He kuhva ro lo lut hi dan ang thlapa lut a ni lo tih a chiang em em chungin fel taka chhiah chhung lut pawl an awm a, chhiah pawh chhung lut loa kal tlang an awm bawk.

Chhiah pete chhiah pek dan kalphung leh a chhiah latu sorkarin a lâk dan thlengin thil kal dan hriatthiam harsa a tam hle. Myanmar kaltlanga lo lut a ni tih chiang mah se a hre chiangte chuan Myanmar ni lo ram dang aṭanga lo lut niin an sawi thung a, chuti chung chuan Myanmar aṭanga lo lut anga ziah luha kan pawm leh a remchan anga chhiah kan lo lâk dante thleng hian thil kal dan hi hriatthiam a harsa ta hle a ni.

Central YMA lam chuan dan loa kuhva lo lut an do thu an puang dup dup a. Chief Minister-in kuhva mai ni lo khaw chhak aṭanga dan loa thil lo lut tihtawp an tum thu a sawi bawk. Chutihlaiin GST lâk dan chu 'dan dik tak' tiin an sawi mawi bawk a, mipui tán awih tur leh awih loh tur chin pawh hriatthiam a harsa hle a ni.