I fimkhur thar leh ang u
Health & Family Welfare minister chuan, tun hnaiah state páwn aṭangin Mizoramah mi sing chuang an rawn haw dawn avangin Mizoramah Covid-19 hripui a darh loh nan fimkhur a
ṭul ber hun a thlen mek thu a sawi.
India ram pum aiin Mizoram hi Covid-19 laka inveng turin a in lockdown hmasa zawk a, sorkarin lockdown a puan hma pawh khan mimal ṭhahnemngai tam tak chu lockdown duhin an lo au chhuak tawh a; chhungkaw tam tak chu khawlaiah chhuak duh tawh loin an inkharkhip tawh a ni.
Covid-19 hri darh ṭan tir lakah Mizote kha kan inveng ṭha a ni satliah lo a, a ram pumin a hlauhin kan hlau a ni ber mai. Hlauh tur dik kan hlau a, khawvel ram changkang leh hausa zawk, damdawiin leh hmanraw nei ṭha ber ber pawhin a sang bia an thihpui a nih avangin hlauh tur pawh a ni reng a; nimahsela a pawi ber mai chu Covid-19 kan tana a hlauhawm zuallai taka tun hnaia kan inthlahdah ṭan nia lang hi a ni.
Covid-19 avanga inkharkhip bul ṭan chhoh laia kan hlauh dan em em kha chu khawlaiah mihring veivak hmuh tur awm mang lo khawpin a reh kha a ni a, a hunlai kha chuan a ṭulzia kan sawi nasa hle. Khatih hunlai khan India hmarchhakah khan Covid-19 positive a an la awm meuh lo a tih theih a, kan ṭhenawm Myanmar lamah pawh an la tlem hle.
Tunah hian ṭhenawm Assam-ah mi 100 dawn positive an awm tawh a, Tripura-ah ringawt pawh mi 160 chuang positive hmuh an ni tawh a, Myanmar-ah ni se an pung zel a, Bangladesh thlengin postive hi an pung nasa hle. Hei mai hi a ni lo a, India ram hmun hrang hrang aṭangin Mizo tangkhangte an lo haw khawm mek a, a ṭhente hi Covid-19 hluarna (Red Zone) hmuna mite an ni nawk a, kan dinhmun hi tun hma zawng ai khan a hlauhawm ta zawk niin a lang.
Tun hi fimkhur hun dik tak chu a ni a, eizawnna thila kan ṭul tâk avanga inthlahdah a thiang lo a, vak chhuak lo thei lote pawh tun hma zawng aiin fimkhur zual se, tih tur ṭul bik nei ni lo zawng chu inkhung zir thar leh ila. Thla khat chhung vel Covid-19 positive hi kan neih belh lo a nih chuan, Pathian zarah zawi zawiin ngai kan awh chhoh theih a beiseiawm chauh ang.