Sum hmuh theihna tura sorkar laipuia Thil sawi mawi chintawk neih ni se

Mizoram Rajya Sabha MP chuan tun hnaiah Parliament Budget Session-ah thu sawiin India hmar chhak tan sipai battalion dah aiin Hindi zirtirtu dah a pawimawh zawk thu a sawi a; Hindi zirtirtu a nghet lo leh hlawh hniam zawka chhawr an tam avangin Hindi ngaih pawimawh lohna hial a hring thei dawna a hriat thu a sawi a, Mizoram leh India hmar chhakin Hindi zirtirtu an mamawh thu a sawi.

Mizoram hian tun hma aṭangin MP hi kan nei ve reng ṭhin a, tuna kan Rajya Sabha MP aia ram tana Parliament-a au chhuak tam hi an la awm lo hial awm e. Vawi tam tak thu a sawi tawh mai ni loin huaisen takin ram tana ṭha tur a au chhuahpui ngam a, a fakawm ṭhin hle a ni.

Hetihlai hian tun hnaia a thusawiah hian Hindi zirtirtu rawih belhna sum a duh luatah a sawi uar lutuk hret em aw, a tih theih. BJP kaihhruai sorkar lawm zawng tak sawi tuma thiam taka Hindi zirtirtu dil belh a ang a; Mizoram hian Hindi zirtirtu rawihna tur sum chu a mamawh ngei ang a, nimahsela sorkar laipui lawm zawng zawnga Hindi pawimawhzia kan sawi uar lutuk palh ang tih erawh a hlauhawm thei a ni.

Mizoram sorkar hian tun hma aṭang tawhin sum hai chuah theihna tur a nih chuan data rintlak tawk lote pawh a hmang zauh zauh tawh niin a lang a, Mizoram sorkar department hrang hrangte data hi a inang lo thluah a ni. Hriselna kawnga sum kan duh vanga kan hriselna dinhmun kan report dan te, zirna lama kan mamawh hmuh dawna kan insawi dan te, kan thil dil tur azira kan insawi tama kan insawi tlam dante thleng hian fimkhur tlan a ṭha hle.

Kan hma zawnah zel pawisa nawr chhuah theihna tur a nih tawh phawt chuan sawi tur leh sawi loh tur kan thliar lo palh ang tih a hlauhawm a, sorkar laipui hotute hmaa thil sawi mawi chintawk thliar thiam hi a ṭul dawn hle a ni.