A hre chiangte an fimkhur

Health & Family Welfare minister chuan Mizoram mipuite kan fimkhur loh chuan zan hnih khat lekah chhiatna vawrtawp tawk thei kan nih thu a sawi a; Indian Medical Association hruaitute pawhin state pawn lam mi an lo haw khawm mek avanga fimkhur a ṭul thu leh hima inngaih mai loh tur tih an  sawi bawk. 

Mizoram chhung­ah Covid-19 vei pakhat kan nei a, chu chu enkawl dam a ni tawh. Tuna a lan dan mai chuan he hripui hian Mizoram chhung hi a lut lo niin a ngaih theih a, hei vang hian mi tam tak chu an ngaih a ṭha tawh a, hna pangngai chhunzawma nunphung pangngaia kir leh an duh thu an tlangaupui ṭan ta. 

Hetihlai hian fimkhur a la ṭul thu leh kan dinhmun a la him tawk lohzia sawi an awm ve reng bawk a, heng zingah hian mithiamte leh thil hre chiang zawk nia langte an tel zel. Kan state chhung bik kan thlir chuan han hlauhthawn chiam tur emaw, ei leh bar zawnna tiṭhuanawp khawpa kal a ṭulna a awm tawh lo angin a lang a ni mai thei a; amaherawhchu he hripui hi mihring leh mihringa inkai darh zel a nih avang hian kan dinhmun hi him tak anga ngaih tur a ni lem lo ang. 

Mamawhna avangin eizawn a ngai a, hripui hi ṭam kumin a chhunzawm lohna tura kan inbuatsaih a ngai a, loh theih loh chinah chuan kan thawkin kan chhuak tur pawh a ni a; nimahsela kan theihna zawnah inveng ṭheuh ila, pawn chhuak tam lo ila, hman ni deuha kan fimkhur ang tho khan i fimkhur chhunzawm ang u. 

A hre chiang apiang an fimkhur niin a lang a, fimkhurna hi 'dawihzepna' anga ngaih tur a ni lo a, kan zavaiin fimkhur takin Covid-19 laka fihlim turin i ṭang rual ang u.