Press mite zalenna rahbeh
Mizoram Journalists' Association (MJA) Gen. Hqrs. hruaitute chuan, India sorkarin press mite zalenna a pek chu Covid-19 hri léng kaihhnawihah rahbeh tumna awm niin an hria a, chu chu an duh loh thu chief secretary hnenah an thlen.
Tun hnaiah Lunglei district-a ramri tlawh chungchangah, "Media mite'n ramri hrúl an tlawh duh a nih chuan a huam chhung BSF Commandant hnen aṭangin phalna an la hmasa phawt tur a ni ang," tiin thu rel a awm a, hei hi press mite chet velna rahbehna chi khat a ni thei a, ennawn ngei chi a ni ang.
Indonaah pawh press mite leh damdawi lama hnathawkte chu hriatthiam an ni ṭhin a, indona hmun aṭang pawhin media lamin report an pe ṭhin. Hetihlaia BSF batallion pakhat commandant hnuaia kun tura Mizoram press mite dah hi thil fuh tawk lo niin a lang a, thuneitu lamin an ennawn ngei a ṭha ang.
Hetihlai hian press mite zalenna kan tih hian mawhphurhna a keng tel tih press mite pawhin an hriat a ngai. Lirtheia 'Press' tih inziak tar avanga khuahkhirhna hmun leh curfew lai pawha duh duhnaa kal theihna anga ngaih chu a fuh hauh lo a, 'hnathawk tura chhuah phalna' hi duh duh ti theia vah vel phalna ang maia kan hmang a nih chuan a fuh lo ang. Press lamin zalenna an neih hi hnathawk thei tura zalenna a ni tih hriat nawn fo a
ṭha hle.
Engpawhnise tun hnaia chhim lama thurel pakhata press mite zalenna rahbehna awm anga lang thei hi Mizoram sorkar thuneitute hian a rang lamin bawhzui se; Covid-19 hri len laia heti khawpa sorkar thawhpui ṭhatu leh sorkar thupuan puangzar ṭhatu press mite thlavang hauh hi sorkar pawhin a tih ngei tur a ni awm e.