Kan hausakna tur mau

Chief minister leh Hor­ticulture department hotute tun hnaia an ṭhut khawmnaah chief minister chuan, "Chaw leh a hmeha intodelh bakah, economy hlângkai tura hausakna siam turin bamboo development a pawimawh," a ti. 

Sorkar tan ngaihtuah tur a tam hle mai a, rin lawk loh leh inbuatsaih lawk miah loin hripui kan hmachhawn a, chu chu ṭam kumin a zui ang tih hlauhthawnna a lian hle. Kan ṭam mai lohna turin keimahni lamah tih ve tur kan nei a, buh leh thlai tam zawk thar chhuak tura ṭan kan lak a ngai; kan ei khawp ngawr ngawr thar chhuah hi dinchhuahpuina tham a tling ṭhin lo a, sum hai lut tur zawnga ṭan kan lak a ṭul hle.

Kan chief minister hian rorelna ṭhutthleng a ṭhut tirh aṭangin a thusawi a la thlak lo a, mau leh rua hmanga din chhuah hi a theih tih hriain a umzui chho zel a ni. Tuna kan ram kalphungah hi chuan uar bik leh luhchilh bik kan neih loh chuan hlawk thama thar chhuah leh hausakpui tham tura kalpui hi kan nei mang lo a; kan ram a retheih zui zel lohna turin MNF-in an flagship policy-ah rua an neih hi kan state-in a hausakpui tham law law turin kalpui thei se a lawm­awm khawp ang. 

Kan chief minis­ter hian vawi tam tak mau leh rua hmanga kan ram din chhuahna tur thu hi a lo sawi tawh a, a thil hriatah a chiangin a tumah a chiang bawk a, tihhlawhtlin ngei a tum tih pawh a lang. Sorkar hotu lu berin a tum na na nâ chuan a hlawhtling ngei pawhin a rinawm a, thil danga peng kawi loin hausakpui tham turin mau leh rua hi kan buaipui chho dawn a nih hmel.