Smuggler leh CM inzawma puhna hi

Assam chanchinbu Bar chuan Mizoram Chief Minister chu Myanmar aṭanga dan loa kuhva tawlh rutu smuggler lian tak Abu Mazumdar nen New Delhi-a zanriah kilah puhin a thlalak nen an tarlang a; Mizoram Chief Minister Office chuan chhângin thu dik lo a nih thu leh Abu Mazumdar hi zanriah kil turin Assam Chief Minister-in a sawm zawk niin an sawi.

MNF chuan CM an puhna hi sawi­fiahin an puhna hi dawt a nih thu leh zanriah kilna hmun hi Assam Bhawan niin an sawi a, Abu Mazumdar-a sawmtu chu Assam Chief Minister a nih zawk thu an tarlang. MNF thuchhuah tarlan danin Abu Mazumdar hian zanriah an kil hma hian Mizoram House-ah Mizoram CM leh a ṭawiawmtute hi a va hmu hmasa a, anni hian Assam House-a thleng turin an lo kawhhmuh zawk a ni.

Mizoramin Myanmar aṭanga kuhna tawlh luh kan buaipui lai, police check gate-te hial pawh an paltlang thei nia a lan avanga mipuiin mak tia an thlir lai, Central YMA pawhin tihtawp ngei tuma ṭan an khawhlai leh dan loa sumdawnna lian smuggling hluar avanga Mizo mipui thikthu chhiatlai taka Assam lam media-in Mizoram Chief Minister hetianga an rawn puh hi a lungawithlak lo a ni. Chief Minister office-in thu dik lo leh dawt a nih thu a sawifiah tawh ang hian inpuh hmingchhiat tumna ringawt pawh a ni ve thei ang.

Chutihlaiin MNF party thu­chhuahin Abu Ma­zum­dar-a'n Mizoram House-a Mizoram Chief Minister te a lo va hmu hmasa leh, anni lamin Assam Bhawan lama thleng zawk tura an kawhhmuh lêt hlauh mai hi chuan ngaihtuah a tithui deuh a; Assam lam mi Abu Mazumdar hian kan state Chief Minister meuh a hun chep tak karah a zinnaah lehnghal Mizoram House-ah a hmu thei a, kan CM leh amah ṭawiawmtute'n Abu Mazumdar-a thlenna tur an kawhhmuh thu MNF party-in an ziak lang a ni.

Engpawhnise state ṭhenawm media-in kan Chief Minister leh smuggler inzawm ang maia an puh hi ngawih bopui chi a ni lo a, insawifiahna piah lamah hian court-ah hial kalpui thei se a ṭha hle ang.