CM, Airport leh Covid-19 dona

ZPM chuan Mizoram chief minister chu mipuite thlamuan tura che chhuak ngam lo chunga Lengpui Airport tlawh tluk tlukah an puh a; Congress ṭhalaite pawh kan chief minister chu ramria task force duty-te thlamuan tura vawi khat pawh la kal chhuak loin tun hnaiah ringawt Lêngpui Airport vawi thum a tlawh tawh thu an sawi.

Chief minister a ni a, Mizoram chhunga thil awmte hi a vilin a ngaihsak tur a ni a, Lengpui Airport a vil hi thil mak leh danglam a ni lo a, sawisel loa fakna tur zawk niin a lang. Nimahsela a fuh lo lai chu Covid-19 hripui a lenlaia hmun dangah pawh kal chhuak thei loin ṭum thum ngawt mai airport a tlawh hi a ni zawk awm e. 

Covid-19 avangin mipui kan rum a, a bikin sorkar aṭanga thlà bi hlawh lâk tur nei lo mirethei zawk an buai tawh hle. Hetihlai hian kan hun tawn hrehawmna belhchhah theitu leh thihna hial thlen theitu Covid-19 a lo luh lohna turin ramriah duty a ngai a, mahni hna ṭul kalsanin ram tán tiin mi ṭhahnemngaite an riak chhuak mêk a ni. Heng local task force member ram mute pawh tlawh lo a, airport zawk a khat tawka tlawh sek mai hi chu thil mak tak chu a ni. 

Airport ngaihsaktu leh tlawh taima em em CM neih hi thil lawmawm tak ni tur a ni a; nimahsela a tlawh hun ngaihtuah hian a fuh tawk lo a, a kum a tam ve deuh tawh avanga hri len laia a inkhung nia mipuiin an ngaih laia Lengpui Airport a tlawh reng thei mai hi an hriatthiam loh lai a nih hmel. 

Kan chief minister hian vawi khat mai ni lo, vawi thum lai mai Lengpui Airport a tlawh hian ngaih a tiṭha lo lek lek a, he thilah hian a ṭhahnemngaihna piah lamah thil dang awm lo hram se a ṭha khawp mai. Chutih rualin Lengpui Airport a thleng thei a nih chuan, a thlang lawka hlawh nei loa ramri venga riak chhuakte tlawh tel thei hlauh se task force lam an läwmin an phûr thar phah ngei ang.