Sikul building sak dan rinhlelhawm
NABARD sum cheng nuai 3,500 pûk hmanga sikul eng emaw zat sak ṭhat leh chet ṭhat chu a lungawithlak loh thu leh a nih dan tur ni lo a tam thu MZP-te chuan tun hnai khan an sawi a, School Education Minister-in siam ṭhat a nih tur thu MZP hruaitute hi a hrilh.
He thil hi eptu party lam pawhin ngaimawhin an lo au chhuahpui tawh a, tunah MZP-in RTI Act hmanga an dil chhuah leh a hmuna an tlawh hnuah thil dik lo tam tak a awm thu an puang ve leh ta.
Hetianga kan zirna in sak ṭhatna tur sum a chingpen nia lang hi a vanduaithlak takzet a ni.
Sikul building sak ṭhatna tur sum hi a pûka kan pûk a ni a, chuti a nih chuan rulh leh ngai a la ni. Tuna sorkarna vawnfung chelhtute hian building sakna tur leh thil sakna (construction) tur lam hawiah department hrang hrang atan a theihna zawn zawnah sum an pûk huai hle mai a, ram tana ṭha zawk tura an ngaih vang a nih hmel a; nimahsela rulh leh a la ngai dawn a, an hunlaia sum awm anga lang hi nakina state phurrit a ni zui ang tih hlauhawm tak a ni.
Tunah zirlai pawlin thil dik lo tam tak a awm ngei tih an au chhuahpui tawh a, chumi hnua, "Siam ṭhat a ni ang," tih ringawt anga thil a liam leh mai ṭhin hi a pawi a ni. Tidik lo na nâ nâ chuan hrem an phu a, a Minister tan hlei hlei pawh hnathawk ṭha lo chu duhsak tlak an nih loh bakah amah timualphotu an ni lêt tih hria se, he sikul sakna tur sum kan pûk hman dan dik loa puhna hi heti hian zuih ral mai lo se a ṭha hle ang.