Sorkar leh inrenchem

Council of Minister tun hnaia ṭhukhawm chuan Covid-19 vanga inrenchemna tura rawtna lut ṭhenkhat an pawm a; Covid-19 avanga sum leh pai dinhmun a chhiat lutuk lohna atana ruahmanna siamtu tur a din a, chu'ng mite'n rawtna an neih - 'Proposal on Economy Measures to Be Adopted by the Government of Mizoram in the Wake of Covid-19' chu an pawm. 

Thawh chhuah nei lo state kan ni a, he ram hian sorkar laipui aṭanga sum leh pai a dawn ang ang renchem taka hmang tur a nihlai hian, kawng hrang hrangah a nei ber thawkin kan thaw ṭhin emaw tih mai tur a ni a, a zialo ngawt mai. Tunah Covid-19 a lo thleng thut mai a, sorkar laipuiin kan beisei ang pawisa min pe thei lo a, thla hnih khat thil thuah kan state chu a talbuai nghal a ni. 

Heti taka economy nghet lo ni chunga MLA hlawh sang ber zinga mi kan ni ngawt mai te, kan sorkar hnathawkte hlawh sang em em maite leh sorkar inrelbawlna atana sum kan hmang tam lutukte hi ennawn ngam a ngai a, kan mamawh vang ni loa tute emaw remchanna tura sorkar hna kan insiam chawp ṭhinte hi kan tuar ta a ni. Hetianga dinhmun chhe taka kan ding chung hian sorkar zirtirtu awm sate sawn darh ngam loin khawpuia indaih em em chungin insengsoin zirtirtu an lak belh zel a, tun hnaia Homeguard training chhuakte pawh dan anga advertisement ang thlapa lak an nih leh nih loh pawh chhui chian a ṭha khawp mai. 

Sorkar hian inrenchem a duh a nih chuan sum ûm reng renga khawsak hi a sim ṭhen a ngai a, sorkar laipui leh funding agency dang aṭanga sum sawi chhuak thei leh project siam thiamte chawimawi leh dah pawimawh pawh hi a hun tawh lo ang. A chhan chu tun hnaia Mizoram sorkarin budget pawn aṭanga sum a neih belh tur an 'sawi chhuah' tam tak hi chu state-in pawisa a tum ve a ngaih bakah a hman pûk, nakina rulh lêt ngai tur a ni a; rei lo te atana inham puarna tur pawisa pawt khawm thiam minister leh sorkar official-te dahsan leh chawimawi chiam aiin kan neih sa inrenchem leh thiam taka hmang tura inzirtir pawh a ṭha tawh zawk mai thei? 

Kan state sorkar hian SEDP kalpui tura board 14 a din pawh hi a ennawn ngam a ṭhat a rinawm a, henga sum sente hi kum khatah chuan cheng vaibelchhe hnih aia tam daih a ni a, hei hi thla tina hlawh leh a inenkawlna atana an hman tur aṭang chauha chhut a la ni. Hei hi Covid-19 hri len hmaa din a ni a, tunah chuan kan state-in sum lamah harsatna kan tawk ta a, heng board 14-te tel lo hian sorkar hian a hnathawk sate ring hian SEDP pawh sem tum mai se a ṭhat zawk a rinawm. 

Sorkar hian inrenchem a tum tak tak a nih chuan huaisen taka ke a pen ngam a ngai a, anmahni din chawp SEDP Board sum sen tihtlem aṭangin ṭan ngam se mipui lung pawh a dam ngei ang.