Kuhva smuggler leh Mizoram CM inkar thu BJP-in an puhna versus CMO thuchhuah

BJP, Mizoram Pradesh chuan thuchhuah siamin Mizoram Chief Minister leh Assam Chief Minister-te'n November 25, 2921-a zanriah an kilho ṭuma tel ve, kuhva smuggler nia puh Abu Mazumdar chu Mizoram CM ṭawiawmtu a nih thu an puang a; he thu hi Assam CM Secretary, Assam MLA ni bawkin a sawi niin an tarlang.

Assam lam media Barak Bulletin chuan tun hnai khan Abu Mazumdar hian New Delhi-a zanriah kilnaah hian Mizoram Chief Minis­ter a ṭawiawm tiin thu an lo chhuah tawh a, hei hi chhang­in Mizoram Chief Minister office chuan thu belhchian dawl lo leh dawt phuahchawp mai a nih thu an sawifiah tawh. MNF party pawhin thuchhuah siamin Barak Bulletin thuchhuah hi rintlak loh a nih thu an sawi a, he mi rual hian Abu Mazumdar hian Mizoram House-ah Chief Minister hi a hmuh thu an ziak lang tel thung a ni.

Tunah Mizoram BJP chuan Amu Mazumdar-a sawmtu tak chu Mizoram Chief Minister a nih thu an sawi ve leh ta a, he thu sawitu hi Assam lam MLA a ni nghe nghe. MLA a nih tak avangin a thusawi hi a dik ta tihna a ni bik lo a, chutihlaiin ani thusawi hi lo dik palh ta se Mizoram Chief Minister's Office hian thu dik tawk lo an puangzar tihna a ni dawn a, a zialo dawn hle a ni.

Engpawhnise kuhva tawlhruka lian taka inhnamhnawih Abu Mazumdar hi state pahnih CM-te zanriah kilnaah hian a tel ngei tih thlalakah a chiang a, a sawmtu zawk nih duh loin an inpuh tawn a ang ta hle.

He smuggler hi Chief Minis­ter zanriah kilnaah hian tu zawkin nge sawm tih hi Mizoram mipui hian hriat an duh a, hriat ngei pawh an phû bawk a ni.