Sorkar kan puih tlan a ngai

Chief minister leh Finance changtu ni bawk chuan Mizoram sum dinhmun a ṭhat loh thu sawiin, "Kan pawisa fai dinhmun a chhiat avang leh central aṭanga sum kan hmuh ṭhat loh chuan ei tur leina kan neih loh a hlauhawm avangin, sorkar hnathawk hlawh laksak ni loin, batsak rih Cabinet chuan a rél," a ti a, Mizoram chu  sumah kan harsat thu a sawi. 

Tun hnaia poli­tics-a thu inchuh lian tak chu Finance minister hian a rawn sawi chiang ta hle a, kan sum dinhmun a ṭha lo mai ni loin tunah chuan sorkar hnathawkte hlawh pawh pûk ṭhen a ngai dawn ta hial a ni. Hei hian chiang taka a hailan chu Mizoram hi thla hnih khat pawisa a luh ṭhat loh chuan kan ṭam titih dawn der a, a hmaa sum tamzia kan sawi ang ngawt kha chu a ni chiah lo. 

Kan chief minister-in uar taka sum tamzia a lo sawi tawh vang emaw, "Budget chu duh leh kan kang thei a, kan chhum thei a, kan bai thei," a tih lam kha theihnghilh tlang tawh ila, tunah chuan Mizoram sum dinhmun chhe zel tur veng tura kan tih theih zawn a hun ta. Sorkar lam inremchem tura kan nawr rualin mipui pawhin tun aia uarin Covid-19 dona lamah thawh uar ila, sorkar insensona phuhruk turin quarantine ngaite pawh mahnia ei leh in intum dan ngaihtuah hram thei ni se a duhawm hle. 

Sorkar a nih vanga kang chat thei lo tuikhur nei a ni lo a, inthlan dawna 'khawh lut pur pur' tia sawi kha chu Covid-19 vangin a bo ta duak a nih hmel a, chuvangin ṭha-hnemngai takin sorkar hi i thawhpui tlang ang u. Hetihlai hian mipuite ei leh bar tur lam ni si lo, sum leh pai thawh chhuah zuina tur pawh ni lem loa sorkarin sum hmanna tur ruahmanna a lo neih tawh tam tak hi tihtawp ngam ve ni se, state sorkarin nakina rulh leh tura pûk chawpa project hrawl pui pui a siamte pawh hi sorkar hnathawk hlawh pûk ṭhen tur sorkar hian kal tlang pui lo ngam se a ṭhat hmel hle. 

Mizoram sorkar sum dinhmun a ṭhat loh avangin mi tinin kan theihna zawnah sorkar puih inhuamin i ṭang rual ang u.