Sumdawngte harsatna

Mizorama Sumdawng pâwl hrang hrang inzawmkhawm, Mizoram Merchant Association (MIMA) chuan thuchhuah siamin, Covid-19 laka invenna leh inkaihhruainate hmang reng chunga hna thawh an duh tawh thu an tarlang a,"A nih loh chuan sorkarin min chhawmdawl rawh se," tiin Covid-19 darh zel lohna atana dawr khar chu hlih an duh thu an sawi a; hripui avanga an eizawnnain a tawrh nasatzia leh kum hnih zet hnathawk mumal loa an awm tawh avanga an harsatnate sorkarin hrethiam se, ṭha taka hnathawh chhunzawm theih an duh thu an puang.

Hripui tuar nasa ber hi hriat theih ni lo mah se Mizoramah chuan sumdawngte hian an tuar nasa hle a, hun rei tak chhung dawr hawng thei lo chungin dawr luah man an chawi a, hnathawkte hlawh an pek a ngai a, dawr hawn theih a nih hnuah pawh ngai an la awh lo nasa hle ang. Chutih rualin he thilah hian sorkar dem hleihtheih pawh a ni lo a, hripui a lêng miau a, chu hri laka kan him theihna a nih beisei in lockdown an kalpui a ni. Lockdown kan kalpui rei tehlul nen, vanduaithlak takin hripuiin a tihbuai nasat ber state zingah kan tel hlauh a, India ram hmun danga second wave leh third wave an sawite chu Mizoramah chuan chatlak awm loin a inchhunzawm pât a ni ber mai.

Hetihlai hian tun hnaia hripui laka kan himna tura inkaihhruaina thar berah Aizawla dawr inhawn chhawk rawtna a awm leh ta a, hei hi sumdawnna hmun aṭanga hripui a darh tihna lam aiin mipui chhuak vak tlem tura an duh avanga rawtna a nih zawk hmel. Rawtna hi a fuh leh fuh loh chu kan hripui dinhmunin a la hril chho dâwn a, kum 2021-a rei zet mai lockdown kan puan leh dawr inhawn chhawk kan kalpui kha chuan hripui tih tlem kawngah chuan a pui lutuk lo a ang hle a ni.

Engpawhnise thuneitu lam tán pawh rorel thiam a harsa hle tih a chiang a, ṭha tura an rinte beisei anga a fuh loh châng a tam a, hei vang hian midangte eizawnnain a tawrh loh dan bera rorel thiam a pawimawh tawh hle a ni.