CM a tiṭha e

Chief minister chuan tun hnai khan khan Assam lam dep hmun hrang hranga ramri vengtute a tlawh a, Mizoram pum him theihna tura an inpekna ropui a tih thu a hrilhin, "Volunteer duty-te hi ram dang tan pawha entawntlak, sorkar laipuia hotute lakah pawh ka chhuan ṭhin an ni," a ti. 

CM hian ramri vengtute a tlawh mai ni loin Chief Minister’s Relief Fund aṭangin Bairabi Joint VC hnena Rs. 20,000 leh silpauline paruk; Vairengte Joint VC hnenah Rs. 40,000, silpauline pariat, hand sanitizer litre 20, hmai tuamna 100 leh kutkawr 100; Zophai leh Phaisen police outpost-a duty-te hnenah Rs. 10,000 ve ve leh silpauline; Kolasib DC hnenah Rs. 20000, hmaituamna 100, kutkawr 100 leh hand sanitizer litre 20 a hlan. 

Mipuiin an lo beisei rûk ang ngeia thla hnih zet an duty tawh hnuah chief minister-in ramri vengtute a tlawh ta hi thil lawmawm leh chhinchhiahtlak tak a ni. Sorkar hotu dangte pawhin ramri duty-te hi an tlawh zauh zauh tawh a; amaherawhchu chief minister meuhin a tlawh hi a tlawha-te tan pawh a lawmawm zual dawn a, rah ṭha tak a chhuah ngei pawh a rinawm a ni. 

CM-in ramri lama duty-te hnena thilpek a hlan lehzelte hi a lawmawmna belhchhahtu a ni a; chutihlaiin Committee on Utilization of Chief Minister’s Relief Fund for COVID-19-te rel ang khan sum hi sem a ni tawh a, chumi bak chu Chief Minister’s Relief Fund aṭang thoa pawisa a pek belh a nih chuan a tlawh ve loh ramri duty dangte pawh hi pek belh ni thei se a kai rual lehzual awm e. 

Chutihlaiin kan CM hi ramri zawng zawng tlawh chhuak turin hun pawh a nei loin atan a remchang lo mai thei a, a hriselna leh a kum ngaihtuah pawhin hri len laia zin chhuak chiam tura beisei chi a ni lo ang. Tuna ramri a tlawh ta hian a ngai pawimawh hle tih a lantirah ngai tlang ila, a aiawh minister dangte leh sorkar official lamin ramri duty-te an tlawhin an vil reng tho a, a taka pen chhuak zel tura beisei leh phût chi pawh a ni lo ang. 

Hri leng kara mahni ngei kal chhuaka ramri tlawhtu chief minister kan nei hi a fakawm hle a ni.