Sorkar hnathawk lungawi lohna

Mizoram sorkar hnuaia hna­thawktu inzawm khawm pawl, Federation of Mizoram Govern­ment Employees and Workers (FMGEW) chuan sorkara an thil phûtte a hlawhtlin loh avangin February 21,2022 aṭangin lung­awilohna lantir an tum.

Sorkar hnathawkte hian dearness allowance chu sorkar laipui hnuaia hnathawkte lâk zata tihpun an phût a; a hunbi dika hlawh lâk an phût bakah sorkar hnathawk chawl tawhte hnena pension leh hamṭhatna dang an dâwn turte a hun taka pek chhuah an phût a ni.

Mizoram sorkarin sum leh paiah har­satna lian tak a tawk a, hetih laia sor­kar hnathawk lamin sum leh pai tam tham tâk sên belhna tur thil phût an lo nei hi sorkar tán a luhaithlak hle ang tih a rinawm. Covid-19 avangin Mizoram sorkar hruai­tute hian sum harsatna kan tawh thu hi an sawi reng a; nimahsela he hripui dona atan hian sorkar laipui aṭangin sum ṭhahnem tak a lo kal a, ṭum danga kan hmuh ngai lohnaah hripui dona tur a lo luh belh zel a. Mipuiin CMRF lamah an chhung lut ruih ruih a, Covid-19 dan bawhchhiate hnen aṭangin sum tam tak sorkarin a lalut tawh bawk a ni.

Sorkar sum dinhmun harsat chhanah hian hripui leng puh hi thil remchang tak a nihlaiin a nihna takah chuan hripui hi lêng lo pawh ni se Mizoram sorkar hian sum hai luhna mumal a nei lo a, ruahmanna chhuan tham a nei lo bawk nen suma harsatna hi chu kan thawk dâwn tih a sawi lâwk theih hial a ni. Heti chung hian kan ram hruaitu leh sum enkawltu lamin an term tir lamah sum tamzia uar takin an sawi a, budget-te chu sorkarin a duh dan dana a pawh kawi theih a nih thu an lo sawi tawh.

Chu vang pawh chu a ni mahna heti khawpa sorkar sum neih loh an sawi uar chung leh, mipui thawh khawm leh sorkar hnathawk hlawh hmanga hripui do ang hiala kan lan hnuah pawh sum sem an la sawi ri tho a, kan mamawh ber pawh ni tawh lo khawpuia lirthei dahna leh hmun hrang hranga infiamna hmunhma leh thil dang atan sum an pe chhuak thei reng tho a, kan sum neih ang chhunte pawh sorkarin a duhna lamah chuan hman tur a nei reng.

Sorkar enkawl lehtu tana rulh huphurhawm khawpin loan leh EAP leh thil dang puk theih ang ang an puk pawp pawp a, a thawktu (contractor) tana sum hmuh lêtna awlsam chi hna (construction) an thawk mawp mawp reng tho a, hei hi sorkar hnathawkte hian an hre chiang hle a ni.

Hei vang hian sorkar hna­thawk intel khawm hian an hamṭhatna tur an nawr ve ta mai niin a ngaih theih a, sorkarin sum dinhmun hi thiam taka a chingfel thuai a ngai a ni.