Ramri ven tluka pawimawh mahni inven

Tunlaiin India ram state danga tangkhang Mizote an rawn haw mek a, chutihlaiin mi tlawmngaite'n hun rei tak chhung an lo kalpui tawh angin hlawh nei loin ramri an la veng zel bawk. Hetihlai hian Aizawl leh khaw ṭhenkhatah chuan nunphung pangngaiah mipui an kir mek a, mask vuah tih loh Covid-19 laka invenna dang social distancing leh kut sil faite chu an kalpui ṭha tawh lo hle a ni. 

Ramri vengin mi tlawmngaite an thawk chhuak a, mahni hna ṭul an kalsan satliah mai a ni lo a, hmun hrehawm takah thlipui leh ruahpui karah, thosi leh vaihmite zingah Mizoram a him theihna turin an thawk chhuak a ni. Covid-19 laka kan him duha ramri hrula mi an inpek viau lai hian khawpuiah chuan mahni ina inkhung kan harsat a, loh theih loh ni lem loa chhuak vak, intihlim tur mai maia tei chhuakte leh leng vakte pawh hmuh tur an tam leh ta. 

Kan do mek Covid-19 hi hmun khata ṭan nat vak avanga hneh mai chi a ni lo a, kil tinah kan zavaia ṭan rual a pawimawh. Hei hi kan theihnghilha kan inthlahdah mai chuan, kan ngam loh chalah chil kan hnawm palh mai ang tih a hlauhawm takzet a ni. 

Tun hnaiah kan ṭhenawm hmar chhak state dangah state pawn aṭanga haw zingah Covid-19 hri kai hmuh chhuah an tam hle a, hetihlai hian Pathian zarah Mizo rawn hawte chu an la him zel niin a lang. Kan theih leh kan inbuatsaih ṭhat lam a ni lo a, Pathian vanna avangin kan state chhunga mite chauh ni loin state pawna Mizote pawh a him pawlah an la ṭang thei zel niin a lang a, a vanneihthlak hle. 

Hetihlai hian mipuite pawhin Covin-19 dona kawngah hian tih ve tur kan nei a, chu chu theihtawp chhuaha mahni inven a ni. Covid-19 dona kawnga kan inthlahdah ṭan mek nia lang hi a pawi takzet a; ramri ven a pawimawh tluk zetin mahni inven thiam a pawimawh tih hriain, Mizo mipuite i ṭang thar leh ang u.