Kuhva tawlh ruk leh sorkar

Central YMA chuan tun hnaiah Chief Minister leh Home Minister hmuin Myanmar aṭanga kuhva ro tawlh ruk tihtawp an duh thu an thlen a, check gate siam turin sorkar an ngen. Mizoram sorkar pawhin kuhna tawlhruk venna turin hmun hnihah check gate an siam mêk a ni.

Tunlaia sawi hlawh tak kuhva ro tawlh ruk hian Mizo­ramah nghawng lian tak tak a nei chho mêk a, dan loa thil tawlh rukna (smuggling) a nih piah lamah hian khawtlang nunah leh ei leh bar zawnna kawng dang thlengin a nghawng thei a, hei hi CYMA lam pawh hian an ngaimawh hle a ni. Mipui nawlpui pawhin an hmuh theih tura khaw en laia ualau taka smuggling kalpuina state kan lo ni ta reng mai hi ngaihtuah chianin a zahthlak a, CYMA lamin an ngen ngai khawpin smuggling hi a lo zalen der tawh tihna a ni.

Tunah kuhva tawlhruk venna tur check gate pahnih ruahman mêk a ni a, thil lawmawm tak a nih rualin a hlawm liana a lo luhna lam Champhai district-a police check gate awm sâ leh duty-na hmunte hi khauh taka an duty duh tak tak chuan harsa lo taka ven theih mai a nih hmel.

Ruihhlo leh ral­thuam tawlh rukte ang lo takin kuhva rah tawlh rukte hi thuhruk sen an ni lo a, motor liana phurh lûk lûk a nih ṭhin avang hian sorkar hian a man duh tak tak a nih chuan awlsam taka man theih a nih hmel. Kuhna tawlh ruk hi a phurh luh theihna kawng siam chawp zel mah se ven sen loh tur a awm hauh lo a, a luhkâ lama lo chân mai hi a finthlak awm e.