Health lama thawktu indaihlohna leh sorkar sum hmanna

Health & Family Welfare Minister chuan Mizoram sorkar hnuaiah doctor, nurse leh health worker namenloin an indaih lo tih a sawi a; nurse-ah post ruak 200 chuang awmin health worker post ruak 300 chuang a awm a, chutihlaiin sorkar tán hna thar lâk zung zung theih an nih si loh thu a sawi.

Health Minister hian Mizoram sorkar tihmualpho tumin thawktu indaihlohna hi a sawi chhuak a ni hauh lo ang a, nimahsela a thusawi avang hian Mizoram sorkar hi a mualpho hle a ni. Hripui leng karah pawh hna ṭhenkhatah pawisa duhtawka hman tur a awm laiin Health department lama mipuite tana thawktu tur lâk theih loh khawpin pawisa a awm lo a ni.

Thil mak tak mai chu tuna sorkar kum kal mekah hian hripui len hma aiin Health department-a sum dah hi a tlem zawk a, hripui len vanglai leh kan hlauh vanglai takin he department hi audit a lo ni tawh bawk. Health department lam audit a nihlai hian department dang chu an audit thawm hriat a ni lo a, chuti taka fira an enkawl Health department lamah chuan thawktu indaihlohna a nasa a, chumi tuartu chu mipui an ni.

Mizoram sorkar hian a duhnaah chuan pawisa hman tur a nei thei reng tho a, mipui thih leh dam thu hril thei, mipui hriselna nghawng Health department lama thawktu indaihlohna zualpui phuhruk tur hian sorkar sum hi hman a rem lo em ni?