Mahni post-a awm lo zirtirtu

Central YMA hruaitute chuan tun hnai khan School Education Minister hmuin zirtirtu mahni post-a awm ṭha lote chungchang an sawipui a, YMA General Conference-ah mahni post-a awm ṭha lo zirtirtute chungchang hi CYMA hmalakna tura rel a lo ni tawh.

Kan ram kal­phung hi kan chik chuan thil tam tak hi a letling hle tih kan hmù thei a, sorkar hnuaia hnathawk zirtirtu ni chunga mahni thawhna hmuna awm ṭha lo an han awm ngam mauh maite hi thil mak tak a ni.

He hi dan bawhchhiatna chiang tak a ni sa tawh a, sorkar hian dan bawh­chhetute hi a hrem mai tur nia a lanlaiin pawn lam aṭanga CYMA-in hma an lâk ngai khawpin zirtirtu inthlahdah an tam tihna a ni.

Hetihlai hian a zirtirtute zawk hian an timak takzet a, mahni eizawnna hmuna awm duh lo nih ringawt mai hi thil danglam tak a ni hrim hrim; nimahsela tun thleng hian zirtirtute an post-a awm tir ṭhap thei/ngam sorkar kan la nei miah lo pawh hi a vanduaithlak hle a ni.

Zirtirtu inthlah­dahten hlawh petu sorkar lam aia pawn lam mi CYMA-te an hläu/zah tawh zawk a nih phei chuan School Education department kalphung hi siam ṭhat a ṭul hle tawh tih a chiang a ni. Sikul building kan sâ ṭha sup sup ang hian zirna siam ṭhat leh zirtirtute siam ṭhat hna pawh thawh a ngai tih a lang chiang ta hle a ni.