Mahni khuaa dan hrapa siam

Tun hnaiah Champhai leh Khawzawl bawrhsapte chuan thuchhuah siamin an district chhunga village task force (VTF)-te chu an khua/venga haw duhte chu haw phalsak turin thu an chhuah a, Covid-19 hlauh avanga sorkar inkaihhruaina awm sa ni lo mahni khaw bil tana a hranpaa dan siam lo turin an hriattir.

Mizoram hi mahni veng leh khua ṭheuh inenkawlna hranpa nei ṭhin kan ni a, 'kan veng/ khaw tih dan' a nih tawh chuan eng dan mahin a ṭhiat thei tak tak ṭhin lo.

Mahni veng leh khua ṭheuh him duha ṭha taka kan humhalhna hian Covid-19 dona kawngah rah ṭha tak a chhuah a, hun rei tak chhung hripui laka kan him theih chhan leh mipui nawlpui pawhin ṭha taka dan an zawm theih chhan kha 'kan khaw dan' hmanga task force lamin min kaihhruai vang a ni tih hi phat rual a ni lo ang. 

Covid-19 laka fihlim zui zel duhna avanga veng leh khaw ṭhenkhatin an huam chhunga hman tur dan an lo siam pawh hi a mak lo a, midang tihchêp tumna lam a ni lo a, midang tana harsatna siamna tur lam aiin an huam chhunga mipuite himna an duh vang a ni. Task force lamin Covid-19 laka an himna tura dan khauh tak an siamte hi anmahni thlirna zawn aṭang chuan a dik thlap a, mipui tam zawk himna an dah pawimawh vangin zin veivakte chuan rei lo te lo tuar ve se, an ti a ni ngei ang. 

Hetihlai hian tunlai khawvelah chuan engkim mai hi langtlang tak leh felfai taka kalpui a ni tawh a. Mahni veng leh khaw bil tana dan hranpa lo siam hi a rem vak tawh lo tih hriatthiam a ṭha hle ang. Hripui laka him duh avanga ruahmanna siam mah ni se, sorkar dan nena inkalha dan hranpa siam loh hi a him ber. Task force lam pawhin hei hi zah thiam se, fimkhur tak chung siin dan hnuaiah kal hram hram tum se a ṭhat a rinawm.