Kuhva check gate siamna hmun

Central YMA ngenna angin Mizoram sorkar chuan Myanmar aṭanga dan loa kuhva tawlh ruk venna turin check gate hmun hnihah a siam a, Aizawl kianga Sihhmuiah leh Sailiamkawn, Serchhipah siamin tun hnai khan hawn a ni.

Mizoram titi lian tak tling phak, Mizoram eco­nomy pawh na taka nghawng phak tura an sawi leh hmun ṭhenkhatah chuan khawtlang nun hial tichhe thei khawpa lian dan loa kuhva tawlh ruk (smuggling) hi kan ramah hian nasa taka kalpui a ni tih zep tur a awm lo. Sorkar dan phal loh ni si, sorkar siam check gate-te awlsam taka paltlang a, vengtu dangte leh police meuh pawhin an man loha ualau taka an kalpui thei hi mipui mak tih a tling.

Kuhva tawlh rutu lam pawh inthup lem loin huaisar taka awmin media an hmachhawn a, ṭhenkhat chuan DC lakah FIR-te an thehlut rap rap a ni. Heti taka smuggling tih nasatna ram kan lo ni ta reng hi a pawi hle a, hei hian tunah leh nakinah kan ramah hian nghawng ṭha lo tak tak a nei dâwn a, smuggling tihtawp hi thil ṭul hmasa a ni.

Smuggling a hluarnaah chuan dan anga sumdawngten an tuar nasa a, an thil zawrh inang lo pawh ni se chhiah pe ve lo sumdawnna hlawk bîk a awmin nasa takin midangin an tuar ṭhin. He mi piah lamah dan loa kuhva ro lakluh hian Kolasib leh Mamit District lama kuthnathawktute nasa takin a tibuai tawh a, an thawhrim rah kuhva hralhna kawngah harsatna an tawk a ni.

Hei vang hian kuhva tawlh ruk hi tihtawp a ṭul a, chutih­laia check gate an siamna erawh ramri aṭangin a hla deuh hret niin a lang. Dan loa kuhva lo lut danna awlsam leh ṭha chu an lakluhna ramriah a nih hmel a, thuhruk leh chheprelh theihna hmun an thlen hmaa man a nih theihna turin ramriah check gate siam belh ni se a ṭha hle ang.