Thingtlang mite inhlawhna sum tihchingpen?

Mizoram sorkarin ni 100 inhlawhna, MGNREGS sum cheng nuai 10,000 chuang a hman dan dik lote sorkar laipuiin a hriat thu leh, mate­rial component atana sum lo kal ṭhin chu ruling party headquarters-a mite invulh nan an hman thu BJP, Mizoram Pradesh hruaitute chuan an sawi a; Union Minister of State for Rural Development rawtna anga com­plain thehluh an tum thu sawiin cheng nuai 10,000 chuang chu district leh block level-a ngaihtuah loa hman ral a nih tawh thu an puang.

Politics-ah hi chuan ṭan lam neia thil kan thlir tawh avangin eng hi nge dik a, eng chin hi nge dik lo tih hi mipui tán thlir thiam a harsa a; tuna BJP-in MNF sorkar chet dan leh thingtlang tihhmasawnna tur sum an tihchingpen dan an sawi pawh hi politics-a hamṭhatna duh vang leh mahni party tana ṭha tura hmalakna a ni thei a, party dang puh hmingchhiat an tumna mai mai pawh a ni thei.

Chutihlaiin Union Minister hma meuhah chiang takin an sawi lang ngam a, press mite hmaah an puan bawk avangin thlirna lehlam aṭang chuan thil thleng tak tak ngei niin a lang.

BJP lam sawi dan hi chuan thingtlang tih hmasawnna tura sorkar laipui aṭanga sum lo kal, keimahni thawh chhuah leh state sorkar dil chhuah pawh ni loa thing­tlang mipuite hmasawnna tur atan liau liaua sum lo kal hi Hnam Run lama thiltithei chinin thiam takin an insem angin a ngaih theih.

He thil hi thil thleng tak tak ni loin politics-a inpuhna satliah ni hlauh zawk se thil lawmawm tak a ni ang. Chutiang ni loa thil thleng tak tak a nih ngat chuan thingtlang mipuite chanai ruling party hruaituten an insem ral ang hialah a ngaih theih dâwn a, a pawi hle a ni.