SEDP board ṭangkaina

ZPM Legislature Party deputy Leader chuan Mizoram sorkar din SEDP Board chu sawiselin mipui sum hman ralna maiah a puh a, kum li chhung ding tawhin kum khatah cheng vaibelchhe 2.6 an hmang. Chutihlaiin kum li chhungin vawi khat chiah an la ṭhukhawm thung nia sawiin an sum hman leh an hnathawh a inmil loh thu a sawi.

Sorkarna vawn fung chelhtute hian sorkar sum hi ṭul leh ṭha an tihnaah an hmang thei a, chutihlaiin an sum hman hi sorkar sum a nih rualin mipui sum a ni bawk. Tuna kan sorkar hian SEDP Board-ah pawisa ṭhahnem tham tak hman hi ṭul niin a hria a, an hmang mek a, hei hian ram tan ṭhatna a la nei dawn pawh a ni thei ang.

Engpawhnise kan state sorkar sum neih loh dan aṭanga thlir chuan sorkar department hrang hrangah thawktu ṭha tak tak an awm tawh chunga board hrang hrang siam belh hi miin an sawisel a nih pawhin a mak lo. Chutih rualin sorkarin lian tham zawk leh chak zawka hnathawh a tum vangin heng board-te hi a din pawh a ni thei.

Tun chinah erawh hi chuan SEDP Board-te sum hman ral zat leh an ṭangkaina hi a la inbuk tawk lo deuh niin a lang a, an term tawp lam an hman mekah hian sorkar hian SEDP Board-te hi ṭangkai takin an la hmang dawn pawh a ni thei a, mipuiin an lo thlir dawn a ni.