Assembly Session ngaihven ang u

Mizoram rorel khawl, Mizoram Legislative Assembly Budget Session chu neih mêk a ni a, tun ṭuma mi hi tun term kal meka session vawi kuana tur a ni ang.

Mizoram mipuite sum tur chu he budget session-ah hian pharh a ni leh dawn a, sawiho a nih hnuah pawm a ni dawn. Chuvangin, he session hi mi zawng zawng min nghawng vek a ni tih hi kan hriat tlan a ṭha e. Bud­get session hi a pawimawhna leh kan tana a ṭangkaina hi kan hre tawk lo deuh ṭhin niin a lang a, mipui nawlpui hian kan ngaihven lo tawp niin a lang ber.

Tunah chuan TV-ah live-a pek chhuah niin mi tin hmuh theihin a awm tawh. Chu aia remchang lehzual chuan YouTube lamah live-in en theih a ni bawk a, kan awmna apiangah mobile phone kal tlanga en theih maiin a awm reng tawh a ni.

Kan aiawh tura kan thlante'n ram tana ṭha tur an relna hmun a ni a, chumi piah lamah mipui sum leh pai hmanna tur an sawihona hmun leh kan ram sukthlek hriatna hun pawimawh tak a ni.

Mipui nawlpuiin kan tuipui lo a nih pawhin zirlai zingah college kal chinte hi chuan ngaihven zual thei se a duhawm hle. Kan ram roreltute kan ngaisang emaw ngaisang lo emaw pawh ni se kan aiawha rorelna ina ṭhu an nih angin an rorelna thu leh hla hi ngaihven a phu hle a ni.