Ramri buaipui a hun chiah em?

Assam-in Mizoram chhunga buaina an siam avanga Assam lamin Mizoram kawngpui an dan chah chu tun hnai khan an hawng ta. Kawngpui dan avanga harsatnate chu sut kian a ni tawh a, ramri erawh chinfel a la ni lo. 

Tun hnaia state pahnihin ramria buaina kan neih chhan hi Assam sorkar official-te bul ṭan vek a ni a, anni lamin district hrang hrangah ramriah thawm an rawn nei lui ni berin a lang. A mipui zawkin rawn ngaimawh loa a state sorkar mi leh sate an rawn thawh chhuah danah khan hotute lam aṭanga ruahmanna fel tak awm a ang a;  nakkuma Assam state inthlang tur nghawng ni ngeiin a lang. 

Assam minister langsar leh NEDA convener Himanta Biswa Sarma khan Assam inthlan zawhah sorkar laipuiin ramri chinfel a tum thu a sawi chhuak a, sorkar laipuiin ramri chinfel an tum thu hi Mizoram lam chuan kan la hre ve lo a nih hmel. Ṭun hnaia ramria Assam official-ten buaina an rawn siam hnua sorkar laipui ramri chinfel tum dan sawi nghal theitu hi NEDA convener a nih miau avangin, NEDA lama an thawhpui MNF party lam pawhin ramri chungchang hi tunah buaipui nghal thei se a hunlai tak a nih hmel. 

Tun hnaia ramria buaina a awm hma hian kan sorkar council of minister ṭhukhawm chuan, Mizoram ramri atan Inner Line Forest Reserve 1875 an pawm thu an lo rel tawh a, chu an ramri pawm chin humhalh tur chuan ke an pen a ngai. A thuphunga pawm ringawt hi a taka chet chhuah si loh chuan awmzia a nei lo a; kawngpui dan avanga harsatna chinfel a nih hnu hian kan ram luah chin chu a la ngai reng. Kan sorkar hi kawngpui a tlang hian a lungawi tawk a nih ngawt loh chuan ramri chinfel turin Assam sorkar leh sorkar laipui hi dawr ṭan tawh rawh se.