Contract hralh chhawn nghawng

Assembly Speaker chu Ngaizawl kawng laihna turah cheng nuai 100 ei vea puhtu an awm avangin Congress leh ZPM chuan dan bawhchhiaah ngaiin Assembly Budget Session kaihruai tlakah an ngai lo a, House Leader hnenah Deputy Speaker kaihhruaitir turin an thlen.

Congress leh ZPM-te ngenna hi House Leader hian tihlawhtling loin Speaker hian session a kaihruai zui a, he mi duh lo hian Congress leh ZPM MLA-te hian House an chhuahsan a, rorelnaah an tel ve lo a ni.

Heng thil zawng zawng lo chhuah chhan hi contract hralh chhawn vang a ni ber a, mi hming hawha hna an thawh vang a ni. Hei hi kan ram ṭhanmawhbawk lian tak a ni a, kan politician-te hi an fihlim lo hle niin rinhlelh an kai nasa a, nimahsela contract lei leh hralhah document hmuh tur a awm tak tak ngai si lo a, tumah hlin lohin an chhuak leh mai ṭhin.

Hna lian tham chinah hi chuan ruling party worker-te hi duhsak an ni tlangpui a, hei bakah hian ruling party lama MLA chinte pawh rinhlelhkai hi an lo awm fo tawh ṭhin.

An MLA hlawh zat kan hriat chian, sumdawnna leh hnathawh dang an neih hriat si loha an sum dinhmun a pung thur thur ṭhinte hi a chhan awm ang chu a chiang mai a, hei hi kan politician-te thil intihhmuh ṭha lo tak leh kan ram hmelma lian tak a ni.

Engpawhnise inpuhna a awm a, a dik leh dik loh erawh hriat mai theih a ni lo a; he thilah ni kher lo hian kan ram hmasawnna hnathawha contract-a induhsak uchhuak te, contract lei leh hralh te, rinhlelh kai khawpa contractor vulh bik neihte hian ram hmasawnna a dâl a ni tih kan hun tawn mek hian a hrilhfiah niin a lang.