Aitlang leh Buarchepa ram

Assembly session neih meka zawhna ziaka chhangin Home Minister chuan Aitlang leh Buarchepa huan leh leilette chu Mizoram sorkarin laklet tumna an nei, a ti a, "Huan neitute buaina leh harsatna tawh pawh hi Mizoram leh Assam state ramri pawm dan inang loin a nghawng/hrin chhuah a ni a, heng buainate chingfel tur chuan state pahnihte ramri buai hi tihfel phawt a ngai dawn," a ti.

Ramri buai chinfel hi thil harsa tak a ni tih chu kan zavaiin kan hre chiang tawh a, ramri buai hmaa kan ram nia kan chhal kan chân ṭhen ta mai erawh a pawi hle a ni.

Hmun ṭhenkhatah chuan kan la luah phak ngai loh ramte kan luah tawh tiin kan hmai pawh a uang dâwn dâwn a, nimahsela 'kan ramri' kan tih chu 1875 ramri kha a nih miau avangin kan ram chhungah Assam lam hi an rawn lut thuk zawk hle a ni.

Tuna sorkarna vawn fing chelhtute hian ramri chinfel hi an duh hle niin a lang a, nimahsela an kawng zawh hi thil awlai a ni lo. Assam-in an rama an chhal leh keini lamin kan rama kan chhal hi ram thuhmun te a lo nih nawk bawk si avangin a tu zawk zawk emaw an tawlh a nih ngawt loh chuan kan inrem mai dawnin a lang lo.

Chutihlaiin tun hnaia ramri buai hmaa kan rama kan chhal, Aitlang leh Buarchepa ramte Assam-in min chhuh a, kuthnathawktuten an ram an chân ta mai hi a pawi takzet a, heng miten an ram an neih let leh ngei theihna turin Mizoram sorkarin chak takin hma la zel se a lawmawm ang.