Nuai 100 laa inpuhna leh politics

MPCC chuan thuchhuah siamin Khawzawl-Ngaizawl kawngpui laihna cheng nuai 820.33 aṭanga Assembly Speaker-in nuai 100 a lak thu voice record-a a lang chhuak chu, "Mizoram politics tibawlh­hlawhtu lian takah kan ngai," an ti a, hmun dangah pawh kawngpui laihnaah a hming a lan thu an sawi.

MPCC thu­chhuahah hian Assembly Speaker hi Congress-a a awm laiin a fapa hminga damdawi license siama khehpuama inhnamhnawiha puhna avangin MNF zawkin total bandh hial an lo huaihawt tawh thu leh, chu thil avang chuan kum 2013-ah Minister-a an dah nawn tawh loh thu leh Congress party-ah chanvo pawi­mawh an pek loh thu an sawi.

Tun hnaia Assembly Speaker an puhna hi thil lian tham tak a ni a, mipui sum kawngpui laihna tura sorkar laipui aṭanga lo kal chu a sum faia cheng nuai 100 lai laa inpuhna a ni.

ZPM party thuchhuah chuan, "Ngun taka finfiahna awmte kan thlirin, voice record hi siam chawp a ni lo tih khaw­tlang aiawh, mi zahkai (prominent citizen), NGO hruai­tute'n an sawi nawn leh hian thu tling leh ngaimawh tlak niin kan hria," an ti zui.

He thil hi politics nen inchawm pawlh lo se nuai 100 la an awm a nih chuan pawi khawih­na lian tak a ni a, hetia political party-te inpuh tawnna mai maiah hian tawp tawh lo se a ṭha hle ang. Congress party thuchhuahah khan amah bawk hi Congress-a a awmlaia khehpuama inhnamhnawiha puh a nih vanga MNF-in total bandh hial an huaihawt phah tawh tih an puang nawn leh a; nimahsela khatihlaia amah chhantu chu Cong­ress bawk hi an ni a, tunah MNF lamin an chhan lêt ve leh ta a ni.

Assembly Speaker chungchangah kher lo pawh hian "Dik chu dik, dik lo chu dik lo," ti loin mahni party mi leh sa hum duhna kan nei zel niin a lang a, rangkachak sumdawnnaa inhnamhnawih te, ruihhlo leh ralthuam sumdawnna kawnga tel ve ngeia ngaihte leh thil dik lo langsar tak titute pawh kan party mi leh sa an niha kan inhum zel dawn a nih chuan ṭhangtharte'n politics an hmel­hriat dan a fuh ngai lo ang.

Cheng nuai 100 laa inpuhna hi thil lian tham tak a ni a, political party inpuh tawnna thil ang lekin zuih ral tawh suh se.