Zirna in hawn leh exam kalpui dana rawtna awm

Mizo Zirlai Pawl leh college hrang hrang zirlai pawlte ṭhu khawm chuan college zirna chu dan pangngaia (off line) kalpui an duh thu Chief Minister leh sorkar hotute bula an thlen tawh chu chu March 4 thleng ngaihchan an rel a. Hetihlai hian online-a class kalpui a nih rau rau chuan MZU hnuaia degree course hrang hrang exam chu online-a kalpui an duh thu an rel.

Zirlai pawlte zawkin zirna in hawn an duh tawh thu leh dan pangngaia kalpui an duh tawh thu an au chhuahpui ta hian kan zirlaite dinhmun a sawifiah hle mai. Hei leh chen hripui avanga zirna in khar a ni ta hian zirlaite zirna kawngah nghawng a nei lian hle ang tih a chiang.

State dangte angin hripui kai dinhmun tlahniam hleithei lo mah se sorkar pawhin kawng hrang hranga inkhuahkhirhna a thlah dul hret hret tawh a, zirna in bika nunphung pangngai zawm theih loh bîk reng hi chu thil finthlak ber a ni tawh lo ang.

Chutihlaiin online class neih a nih vanga online-a exam neih rawtna erawh ngaihtuah nawn a ṭha hle mai a, class kal pawh ngam tawh tana mahni in aṭanga vengtu awm loa exam hmachhawn duh tlatna hi hri hlauhna lam a kawk tawh chiah loin a lang.

Hripui leng mah se zirnain a tawrh reng lohna atana class kal rawttute hian offline ngeia exam hmachhawn pawh hi an zuam turah ngai ila, mahni in lum aṭanga exam hmachhawn loh hi zirlaite tán a ṭhatna a tam zawk ngei ang.