Ar vulhtute harsatna

Assembly Budget Session kal meka zawhna chhangin AH & Vety Minister chuan Mizoram sorkarin ar vulhtute harsatna a hriatpui thu sawiin, an harsatna sut kian tumin hma a lak mek thu leh an hmalakna hrang hrangte a tarlang.

Mizoramah chhung­kaw ṭha­hnem takin eizawn­na atan ar an vulh a, chutih­laiin ṭhen­awm state aṭanga ar lo lut ṭhin avangin a tihralna kawngah harsatna an tawk a ni. Kan ṭhenawm state, a bikin Assam aṭangin awlsam takin ar a lo lut reng a, a chaw man leh ar note lakna man a tlawm zawk bawk si avangin Mizoram chhunga ar vulhtute market tichhe tur tawkin ar man an chhiar a, chu chu Mizorama ar vulhtute'n an tuar niin a lang.

State ṭhenawm ar lakluhte hi a chang chuan ramria khaw awmte'n anmahni ar vulh anga lantirin hlep tlem neiin an rawn thawn lut ve bawk niin a lang a, he mi kawngah hian buaina tenau pawh a lo chhuak tawh ṭhin a ni.

Sorkar hian thiam tak leh awmze nei taka ar lakluh leh tihral dan hi a venpui loh chuan ṭhenawm state-in an duh tawkin Mizoram ar market hi an thunun thei dawn niin a lang; chutihlaiin Mizorama ar vulh­tute pawhin ṭhen­awm state el phak a harsa deuh a nih pawhin a hralhna lamah an tlak-hniam hret a ṭul changte pawh a awm ve maithei.

Engpawhnise Mizoram sorkarin ar vulhtute harsatna hriain ruahmanna a siam dawn a, chu chu ar vulhtute'n nghakhlel takin an thlir reng dawn a ni.