Hri dona pawisa hman dan

MPCC chuan thuchhuah siamin, Mizoram sorkar chu Covid-19 donaa hlawhchhamah an puh a; India hmarchhak state pasarih zinga swab sample endik tam lamah pangana a nih mek thu an tarlan bakah mipuiin CM Relief Fund-ah cheng vbc. 20 chuang an thawh khawm tawh tih sawiin, "Chu'ng zinga a tam zawk chu sorkar bungrua leh kháwl lei nan hman a nih avangin mipuiin pawisa an thawh ṭha duh tawh lo," an ti. 

Zoram Peoples' Movement Ṭhalai pawhin thuchhuah siamin, SRH-ZMC leh Covid care centre (CCC)-a awmte ei man inang lo pek an ni chu an hrethiam lo a; Mizoram sorkarin NEC aṭangin cheng nuai 300, NESIDs aṭangin cheng nuai 647 a dawn tawh thu leh CM Relief Fund-ah sum tam tak mipuiin an chhûn luh tawh thu sawiin, "Sorkarin hri vei enkawl ngai bikte ei leh in man a harsat tlat hi mipuite'n hriatthiam harsa kan ti," an ti. 

Covid-19 avanga sorkarin harsatna a tawh hi mipui pawhin kan hriatthiampui hle niin a lang a, a inbuatsaih lawk loh leh inrin lawk lohnaah sum tam tak hman a ngai a, chuvang chuan sum leh paiah harsatna a tawk chho mek a ni. Hetihlai hian sorkar sum hman dan ṭhenkhat erawh ngun zawka ennawn ṭul chi a awm niin a lang. A bikin CM Relief Fund-a Covid-19 dona atana mipui sum thawh khawm hman dan ṭhenkhat hi chu a zialo hle a ni. 

Mipuiin sum an thawh hian hri veite enkawlna senso tur te, an ei leh in tur leh sorkarin a mamawh zual bika a hman zung zung tur lam a kawk deuh berin a rinawm; chutihlaia sorkar department khawl tur leina atana an lo hmang daih mai te hi a inhmeh lo hle. Sorkar hian khawl hrang hrang a lei duh a, pawisa a nei mai lo a nih chuan SEDP-ah mamawh huna pawh theih tur sum ṭhahnem tak a la 'dah ṭha' reng a, chutihlaia mipui sum thawh khawm a lo hmang hiau hiau mai hi chu a fuh lo hle.

Covid-19 positive zingah mirethei leh khawsak harsa tak takte pawh an awm a, positive-te inenkawlna senso pawh sorkarin a tum thei lo a ni. Chutihlaia sorkarin sum leh pai a hmannate hi mipuiin an hmu vek tho a, mamawhna hmuna pawisa hman thiam ni se a ṭha hle. Sorkarin a sum neih sa a hman danah mipuiin sawi theih an nei lo a nih pawhin, mipuiin an thawh khawm sum hman danah tal hi chuan sawi tur an nei a ni. 

Mipui sum thawh khawm CM Relief Fund-a pawisate chhawmdawlna (relief) atan ni lo, sorkar department khawl (infrastructure) leina atana an hmang daih mai hi chu sorkar hian rûl lêt leh hial se a ṭha ang.