Mau chin leh Mizoram economy

Assembly budget session kal mekah Horticulture depart­ment changtu Chief Minis­ter chuan Mizoram sorkarin mau chinna atan cheng nuai 877.57 a hman tawh thu a sawi a, mau chin chu sorkarin a hlawhtlinga a ngaih thu a sawi.

Chief Minister chuan mau hmanga Mizoram economy chawi kan tum a nih thu leh mau aṭanga thil siam chhuah hrang hrang hmanga intodelh tum a nih thu a sawi.

Kan sorkar flag­ship programme chu mau/ rua a nih thu kan Chief Minister hian a lo sawi tawh a, chu chu kan ram economy chawikanna atan sorkarin hman a tum. State sorkar berin a ngaih pawi­mawh leh sum pawh a dah tamna, ram ei leh bar zawnna kawnga hmasawnna thlen theia a ngaih a nih vang hian mau/ rua hi kan state hian a dah pawimawh a, kan la hlawhtlinpui ngei pawh i beisei ang.

Tunah erawh chuan sorkar pawhin mau/ rua chin aṭanga hlawkna hi a la tel thei bik lo a, mau chi pawh 3,34,425 supply a la ni chauh a ni. Ram pum intodelhna atan leh economy chawikanna tur khawp chuan tun aia lian zawka kalpui hi a ngai dawn a ni.

Kan mau neih sa hralhna leh hman ṭangkaina dap lam aiin rua/mau chi thar lakluh kan la kalpui a, a chi supply thar hmanga chin mek chauh niin a la puitling lo deuh bawk si a, mau/ rua hmanga economy chawikan hi thil theih a nih pawhin tlema nghah peih deuh chu a la ngai dawn a nih hmel - rua/ mau chi supply hmanga chinte a la puitling hman si lo a.