Restricted tender leh politics-a sum siamna

Mizoram Assembly Session neih mek zawhna chhannaah Mizoram sorkarin restricted tender hmangin department hrang hrang hnuaiah hna a pe chhuak nasa hle a; heng hnate hi hna hmawnhmawhtlak a nih vang te, a thiam bik thawh ngai (specialised work) a nih vang te, empanelled firm an nih vangtein restricted tender hmanga hna pek an ni ṭhin.

Tunlai Mizorama ngaimawhawm tak mai chu hmasawnna hna lo kal kan buaipui dan hi a ni a, sum siamna leh politics-a invulhna remchangah kan hmang nasa viau. Construction hna lian tham chinah hi chuan tender kalphung pangngaia tih a, ram tana ro tling ni tura thawh theih ni se a ṭhat tehlul nen, tunah hi chuan 'restricted tender' tih hmingin duhsak zawngte hna inpeknaah kan chantir ta mek a ni.

MNF-in sorkarna vawnfung an chelh hma Congress hunah pawh khan restricted tender-a hna inpek hi a tam a, sorkar lam chuan an inpek chhan chhuan­lam nei ve ṭhin mah se a nihna takah chuan duhsak zawngte vulhna a ni ber zawk. Kan Chief Minister-in a sawifiahnaah phei chuan 'hming hawh' a nih thute thlengin a zêp tawh lo. Chuti a nih phei chuan dan hmaah chuan an thiam lo let der tawh tihna a nih mai hmel a, kan ram hmasawnna tur hna hi 'hming hawh' hmanga kalpui a ni tih sawi a ni ta hial hi a zialo hle.

Midangin an chhan ve theih loh tura duan a, mahni duhsak zawngte chauhin an chhan theih tur restricted tender hmanga hna inpek zozai en hi chuan politics hmanga sum­dawnna kan kalpui vak a ang hle. A firm hmingah chuan eng pawh lo hmang se mipuiin a phena mihring awm hi chu an hai tak tak lo.

Hna hmanhmawhthlak bik leh thiam bik ngai chu a awm ngei a, hai rual a ni lo. Chumi chhuanlama restricted tender hmanga mipui sum kan duhsak zawngte hminga kan pe chhuak reng a nih chuan Mizoram politics hi sum siamnaah kan chantir mai ang tih a hlauhawm ta hle a ni.